பெங்களூருவில் 13 வயது சிறுவன் கடத்தப்பட்டு கொலை செய்யப்பட்ட சம்பவம், திட்டமிட்டு அரங்கேற்றப்பட்டதாக போலீஸ் விசாரணையில் தெரியவந்துள்ளது. சிறுவனின் குடும்பத்துக்கு நன்கு அறிமுகமான அண்டை வீட்டைச் சேர்ந்த பாஸ்கர் ரெட்டி, பணம் பறிக்கும் நோக்கில் இந்தச் சம்பவத்தை திட்டமிட்டதாக விசாரணை தகவல்கள் தெரிவிக்கின்றன.
யெலஹங்கா பகுதியைச் சேர்ந்த பிரஜ்வலை சம்பவத்தன்று பாஸ்கர் ரெட்டி காரில் அழைத்துச் சென்றுள்ளார். விநாயகர் விழாவுக்காக பட்டாசு வாங்கச் செல்லலாம் என்றும், கார் ஓட்டக் கற்றுத் தருவதாகவும் ஆசை காட்டி சிறுவனை அழைத்துச் சென்றதாக போலீஸ் தரப்பு தெரிவித்துள்ளது. பின்னர் மற்றொரு நபருடன் சேர்ந்து சிறுவனை ஆள் நடமாட்டம் இல்லாத பகுதிக்கு அழைத்துச் சென்றுள்ளனர்.
அங்கு பிரஜ்வலை வைத்து கடத்தப்பட்டதைப் போன்ற வீடியோக்களை பதிவு செய்துள்ளனர். பெற்றோரிடம் பணம் கேட்க அந்த வீடியோக்களைப் பயன்படுத்த திட்டமிட்டிருந்ததாக விசாரணையில் தெரியவந்துள்ளது. சிறுவன் தன்னை கடத்தியவர்கள் சொல்வதைப் பேசி, பெற்றோரிடம் பணம் கொடுக்குமாறு கேட்கும் வகையில் காட்சிகள் பதிவு செய்யப்பட்டதாகவும் போலீஸ் தெரிவித்துள்ளது.
ஆனால் திட்டம் அடுத்த கட்டத்துக்குச் செல்லும் முன்பே நிலைமை மாறியது. சிறுவன் தங்களை அடையாளம் கண்டுவிடுவான் என்ற அச்சத்தில் அவரை தாக்கி கொலை செய்ததாக போலீஸ் விசாரணையில் தெரியவந்துள்ளது. மரக்கட்டையால் தாக்கிய பின்னர், மற்றொரு இடத்துக்கு அழைத்துச் சென்று செங்கற்களால் தாக்கியதாக விசாரணை தகவல்கள் கூறுகின்றன.
இதற்கிடையில், இங்கிலாந்தில் படிப்பை முடித்த பாஸ்கர் ரெட்டி, ஆன்லைன் கேமிங் உள்ளிட்ட பழக்கங்களால் ஏற்பட்ட கடன் சுமையை சமாளிக்க பணம் தேடியதாக போலீஸ் விசாரித்து வருகிறது. சிறுவனின் குடும்பத்திடம் இருந்து சுமார் ரூ.1 கோடி வரை பணம் பறிக்க திட்டமிட்டதாக விசாரணை அதிகாரிகள் சந்தேகிக்கின்றனர்.
சிறுவனை கொலை செய்த பிறகு உடலை காரின் பின்பகுதியில் மறைத்து ஆந்திரப் பிரதேசம் நோக்கிச் செல்ல பாஸ்கர் முயன்றதாக போலீஸ் தெரிவித்துள்ளது. வழியில் கார் அடுத்தடுத்து வாகனங்களில் மோதியதால் அவரது திட்டம் வெளிச்சத்துக்கு வந்தது. அங்கு திரண்ட பொதுமக்கள் மற்றும் போலீஸார் காரை சோதனையிட்டபோது, அதன் பின்பகுதியில் சிறுவனின் உடல் கண்டுபிடிக்கப்பட்டது.
இந்தச் சம்பவம் தொடர்பாக பாஸ்கர் ரெட்டி கைது செய்யப்பட்டுள்ளார். அவருடன் தொடர்புடைய மற்றொரு நபரையும் போலீஸார் தேடி வருகின்றனர். சிறுவனைக் கடத்தி கொலை செய்ததற்கான முழு பின்னணி மற்றும் பணம் பறிக்கும் திட்டத்தில் இருவரின் பங்கு குறித்து விசாரணை தொடர்ந்து நடைபெற்று வருகிறது.
Also Read: இடைத்தேர்தல் செலவை எம்.எல்.ஏ.க்களிடம் வசூலிக்க கோரிக்கை.. உயர் நீதிமன்றம் சொன்னது என்ன?
