2027-ஆம் ஆண்டு நடைபெறவுள்ள ஆண்கள் ஒருநாள் கிரிக்கெட் உலகக்கோப்பை தொடருக்கான அதிகாரப்பூர்வ போட்டி அட்டவணை இன்று (அக்டோபர் 1) இரவு 8:30 மணிக்கு தென்னாப்பிரிக்காவின் கேப்டவுனில் உள்ள Zeitz MOCAA அருங்காட்சியகத்தில் வைத்து வெளியிடப்பட உள்ளது. இதனுடன் சேர்த்து, உலகெங்கிலும் உள்ள கிரிக்கெட் ரசிகர்கள் போட்டிகளுக்கான டிக்கெட்டுகளைப் பெறுவதற்காக விண்ணப்பிக்கும் ‘டிக்கெட் பாலாட்’ (Ticket Ballot) எனப்படும் குலுக்கல் முறையிலான பதிவும் இன்று தொடங்குகிறது.
தென்னாப்பிரிக்கா, நமீபியா மற்றும் ஜிம்பாப்வே ஆகிய மூன்று ஆப்பிரிக்க நாடுகளில் இணைந்து நடத்தப்படும் இந்த 14-வது உலகக்கோப்பை தொடரில் மொத்தம் 14 அணிகள் பங்கேற்று, 12 மைதானங்களில் 57 போட்டிகளில் விளையாடவுள்ளன. ரசிகர்களுக்குச் சமமான வாய்ப்பை வழங்கும் நோக்கில் அறிமுகப்படுத்தப்பட்டுள்ள இந்த டிக்கெட் பாலாட் முறையில் பங்கேற்க கட்டணம் எதுவும் கிடையாது. மேலும், இது ‘முன் வருபவருக்கு முன்னுரிமை’ என்ற அடிப்படையில் செயல்படாது; அக்டோபர் 1 முதல் நவம்பர் 21, 2026 வரை பெறப்படும் அனைத்து விண்ணப்பங்களும் சமமாகவே பரிசீலிக்கப்படும் என சர்வதேச கிரிக்கெட் கவுன்சில் தெரிவித்துள்ளது.
இம்முறையில் ரசிகர்கள் தாங்கள் காண விரும்பும் எத்தனை போட்டிகளுக்கு வேண்டுமானாலும் விண்ணப்பிக்கலாம். ஒவ்வொரு போட்டிக்கும் அதிகபட்சமாக 4 டிக்கெட்டுகள் வரை தங்களுக்கு விருப்பமான பிரிவில் (Ticket Category) கோர முடியும். குறிப்பிட்ட போட்டிக்கு நிர்ணயிக்கப்பட்ட டிக்கெட்டுகளை விட அதிகமான விண்ணப்பங்கள் வரும் பட்சத்தில், கணினி வழியிலான ரேண்டம் குலுக்கல் முறை மூலம் வெற்றியாளர்கள் தேர்வு செய்யப்படுவர்.
குலுக்கல் முறையில் தேர்வாகும் வெற்றியாளர்களுக்கு மின்னஞ்சல் மூலம் தகவல் அனுப்பப்பட்டு, டிக்கெட்டுகளை வாங்கி கொள்வதற்கான கால அவகாசம் வழங்கப்படும். அதேவேளையில், தேவைக்கு அதிகமான விண்ணப்பங்கள் வராத போட்டிகளுக்கான டிக்கெட்டுகள், பதிவு செய்த ரசிகர்களுக்கு நேரடியாக விற்பனை செய்யப்படும். இருப்பினும், இந்த பாலாட் முறையில் பதிவு செய்வது மட்டுமே டிக்கெட்டை உறுதி செய்யாது என்பதையும், இதற்கென தனிப்பணம் எதுவும் கட்டத் தேவையில்லை என்பதையும் ஐசிசி தெளிவுபடுத்தியுள்ளது.
