பெங்களூரில் இருந்து திருச்செந்தூர் நோக்கிப் பயணிகளுடன் சென்றுகொண்டிருந்த ஆம்னி பேருந்து, கட்டுப்பாட்டை இழந்து தண்ணீர் லாரி மீது மோதிய விபத்தில் ஒருவர் சம்பவ இடத்திலேயே உயிரிழந்தார்.
கர்நாடக மாநிலம் பெங்களூரில் இருந்து பயணிகளை ஏற்றிக்கொண்டு தனியார் ஆம்னி பேருந்து ஒன்று தூத்துக்குடி மாவட்டம் திருச்செந்தூரை நோக்கிப் பயணித்துக் கொண்டிருந்தது. இன்று அதிகாலை எட்டையபுரம் பிரதான சாலையில் பேருந்து சென்றுகொண்டிருந்தபோது, எதிர்பாராதவிதமாக ஓட்டுநரின் கட்டுப்பாட்டை இழந்து தாறுமாறாக ஓடியது. அப்போது அதே வழித்தடத்தில் முன்னால் சென்றுகொண்டிருந்த தண்ணீர் லாரியின் பின்பகுதியில் பயங்கர வேகத்துடன் மோதி விபத்துக்குள்ளானது.
இந்த கோர மோதலில் ஆம்னி பேருந்தின் முன்பகுதி சுக்குநூறாக நொறுங்கியது. பேருந்தின் முன் இருக்கையில் அமர்ந்திருந்த பயணி ஒருவர் இடிபாடுகளுக்குள் சிக்கி சம்பவ இடத்திலேயே பரிதாபமாக உயிரிழந்தார். மேலும் பேருந்தில் பயணம் செய்த 6 பயணிகள் பலத்த காயமடைந்து உயிருக்குப் போராடினர். விபத்து நடந்த சத்தம் கேட்டு ஓடிவந்த அப்பகுதி பொதுமக்கள், உடனடியாக இடிபாடுகளை அகற்றி காயமடைந்தவர்களை மீட்டு சிகிச்சைக்காகத் தூத்துக்குடி அரசு மருத்துவக் கல்லூரி மருத்துவமனைக்கு அனுப்பி வைத்தனர்.
தகவலறிந்து விரைந்து வந்த உள்ளூர் போலீசார், பலியான நபரின் உடலை மீட்டுப் பிரேத பரிசோதனைக்காக அனுப்பி வைத்தனர். விபத்து தொடர்பாக வழக்குப் பதிவு செய்த போலீசார், கவனக்குறைவாக பேருந்தை இயக்கிய ஓட்டுநரை\க் கைது செய்து தீவிர விசாரணை மேற்கொண்டு வருகின்றனர்.
