தென்மேற்கு பருவமழை படிப்படியாக விடைபெற்று வரும் நிலையில், தமிழகத்திற்கு அதிக மழைப்பொழிவை தரும் வடகிழக்கு பருவமழை வரும் அக்டோபர் 20-ஆம் தேதிக்குள் தொடங்குவதற்கான சாதகமான சூழல் நிலவுவதாக சென்னை மண்டல வானிலை ஆய்வு மையம் தெரிவித்துள்ளது. ‘எல் நினோ’ வானிலை மாற்றத்தின் காரணமாக இந்த ஆண்டு வடகிழக்கு பருவமழை காலத்தில் வழக்கத்தை விட அதீத கனமழை கொட்டித் தீர்க்க வாய்ப்புள்ளதாகவும் எச்சரிக்கப்பட்டுள்ளது.
நடப்பு ஆண்டில் நாடு முழுவதும் தென்மேற்கு பருவமழை இயல்பை விட 13 சதவீதம் குறைவாகவும், தமிழகத்தில் ஒட்டுமொத்தமாக 20 சதவீதம் குறைவாகவும் பதிவாகியுள்ளது. ஒரு சில மாவட்டங்களை தவிர்த்து பெரும்பாலான பகுதிகளில் 10 முதல் 15 சதவீதம் வரை மழைப்பற்றாக்குறை நீடித்து வருகிறது. அடுத்த 10 தினங்களுக்குள் தென்மேற்கு பருவமழை இந்தியப் பகுதிகளை விட்டு முழுமையாக விலகும் என எதிர்பார்க்கப்படுகிறது.
சென்னை மண்டல வானிலை ஆய்வு மைய இயக்குநர் துரை கூறுகையில், “மத்தியப் பிரதேசப் பகுதியில் உருவாகும் காற்றழுத்தத் தாழ்வுப் பகுதியை தொடர்ந்து, வளிமண்டலத்தில் வடகிழக்கு காற்று வீசத் தொடங்கும். அக்டோபர் 20-க்குள் வடகிழக்கு பருவமழை தொடங்குவது வழக்கம் என்பதால், இந்த ஆண்டும் அதே காலகட்டத்தில் மழைக்காலம் தொடங்க அனைத்து காரணிகளும் சாதகமாக உள்ளன. எல் நினோ தாக்கத்தால் குறிப்பிட்ட சில காலகட்டங்களில் அதி தீவிர கனமழை பொழியக்கூடும். மாநிலப் பேரிடர் மேலாண்மைத் துறையுடன் இணைந்து ஒருங்கிணைந்த முன்னெச்சரிக்கை நடவடிக்கைகள் தீவிரப்படுத்தப்பட வேண்டும்” என்றார்.
Read More : எல் நினோ தாக்கம் குறைந்ததும் என்ன நடக்கும்? குட் நியூஸ் சொன்ன இஸ்ரோ முன்னாள் தலைவர் சிவன்!
