மொபைல் ரீசார்ஜ் செலவு அதிகரித்து வரும் நேரத்தில், புதிய வாடிக்கையாளர்களை ஈர்க்கும் வகையில் BSNL நிறுவனம் ரூ.1-க்கு புதிய இணைப்பு வழங்கும் ‘Freedom 2.0’ சலுகையை நீட்டித்துள்ளது.
இந்த சலுகையின் சிறப்பு என்னவென்றால், ரூ.1-க்கு இணைப்பு பெற்ற பிறகு 24 நாட்களுக்கு தினமும் 1GB அதிவேக டேட்டா பயன்படுத்த முடியும். இதனுடன் வரம்பற்ற அழைப்புகளும், தினமும் 100 SMS-களும் வழங்கப்படுகின்றன. அதாவது 24 நாட்களிலும் தினசரி டேட்டா ஒதுக்கீட்டை முழுமையாக பயன்படுத்தினால் 24GB வரை டேட்டா கிடைக்கும்.
புதிய BSNL எண்ணை வாங்குபவர்களை மட்டுமே இந்த சலுகை குறிவைக்கிறது. ஏற்கனவே BSNL எண்ணை பயன்படுத்தி வருபவர்கள் தங்களது தற்போதைய எண்ணில் ரூ.1-க்கு இந்த பலன்களைப் பெற முடியாது. அதேபோல், வேறு நெட்வொர்க்கில் இருந்து BSNL-க்கு மாறும் புதிய வாடிக்கையாளர்களும் இந்த சலுகையை பயன்படுத்தும் வாய்ப்பு உள்ளது.
இதற்காக அருகிலுள்ள BSNL வாடிக்கையாளர் சேவை மையம் அல்லது அங்கீகரிக்கப்பட்ட விற்பனை நிலையத்தை அணுக வேண்டும். அடையாளச் சரிபார்ப்பு உள்ளிட்ட வழக்கமான நடைமுறைகள் முடிந்த பின்னர் புதிய இணைப்பு செயல்படுத்தப்படும்.
BSNL-ன் 4G சேவையை புதிய பயனர்கள் முயற்சி செய்து பார்க்கும் வகையில் இந்த சலுகை கொண்டு வரப்பட்டுள்ளது. சுதந்திர தினத்தை முன்னிட்டு அறிமுகப்படுத்தப்பட்ட இந்த Freedom 2.0 திட்டத்தின் காலக்கெடு தற்போது அக்டோபர் 12, 2026 வரை நீட்டிக்கப்பட்டுள்ளதாக தகவல் தெரிவிக்கிறது.
இருப்பினும், இந்த சலுகையை பெறுவதற்கு முன்பு சில விஷயங்களை கவனிக்க வேண்டும். ரூ.1 என்பது புதிய இணைப்புக்கான சலுகை கட்டணம் மட்டுமே என்பதால், அடுத்தடுத்த ரீசார்ஜ் விதிமுறைகள் தனியாக இருக்கலாம். மேலும், உங்கள் பகுதியில் BSNL 4G சேவையின் வேகம் மற்றும் அழைப்புத் தரம் எப்படி உள்ளது என்பதையும் முன்கூட்டியே சரிபார்ப்பது அவசியம்.
குறைந்த தொடக்கச் செலவில் புதிய மொபைல் இணைப்பை முயற்சி செய்ய விரும்புபவர்களுக்கு, 24 நாட்களுக்கு டேட்டா, அழைப்புகள், SMS என மூன்று முக்கிய சேவைகளையும் வழங்கும் இந்த சலுகை கவனம் பெறுகிறது.
Also Read: விஜய்க்கு போட்டியாக சிவகார்த்திகேயனா? திடீரென அதிகரிக்கும் அரசியல் பேச்சு!
