சட்டமன்ற தேர்தலில் சென்னை பெரம்பூர் தொகுதியில் 53,715 வாக்குகள் வித்தியாசத்தில் வெற்றி பெற்ற முதலமைச்சர் விஜய்யின் வெற்றியை எதிர்த்து, அவரை எதிர்த்துப் போட்டியிட்ட திமுக வேட்பாளர் ஆர்.டி.சேகர் மற்றும் வாக்காளர்களான தினேஷ், லட்சுமி நரசிம்மன் ஆகியோர் சென்னை உயர்நீதிமன்றத்தில் தேர்தல் வழக்குகளைத் தொடுத்திருந்தனர்.
இந்த வழக்குகளை ஆரம்பக் கட்டத்திலேயே தள்ளுபடி செய்து நிராகரிக்க வேண்டும் எனக் கோரி முதல்வர் விஜய் தரப்பில் இடையீட்டு மனுக்கள் தாக்கல் செய்யப்பட்ட நிலையில், நீதிபதி வி.லட்சுமி நாராயணன் முன்னிலையில் தொடர்ந்து மூன்று நாட்களாக நடைபெற்ற இறுதி விசாரணை தற்போது நிறைவடைந்துள்ளது.
விசாரணையின் போது விஜய் தரப்பில் மூத்த வழக்கறிஞர்கள் ஆஜராகி, உச்சநீதிமன்றத்தின் முக்கியத் தீர்ப்புகள் மற்றும் சட்ட ஆணையத்தின் பரிந்துரைகளை மேற்கோள் காட்டி வாதாடினர். வேட்புமனுவில் சொத்து விவரங்கள் முழுமையாகத் தெரிவிக்கப்படவில்லை எனக் கூறப்படும் புகார்களில் எந்தவொரு அடிப்படை முகாந்திரமோ ஆதாரமோ இல்லை எனவும் தெரிவித்தனர்.
இதற்குப் பதிலளித்த வாக்காளர் தரப்பு வழக்கறிஞர், பண்ருட்டியில் உள்ள ரூ.30 கோடி மதிப்பிலான சொத்து விவரங்களை விஜய் வேண்டுமென்றே மறைத்துள்ளதாகவும், அதற்கான சர்வே எண் மற்றும் விற்பனைப் பத்திரம் உள்ளிட்ட ஆவணங்கள் நீதிமன்றத்தில் சமர்ப்பிக்கப்பட்டுள்ளதால் இது மேலோட்டமான புகார் அல்ல என்றும், குற்ற வழக்குகளைப் போலவே சொத்துகளை மறைப்பதும் ஊழல் நடவடிக்கையே என்றும் வாதிட்டனர்.
மனுதாரரின் இந்த வாதத்தைக் கேட்ட நீதிபதி லட்சுமி நாராயணன் சரமாரி கேள்விகளை முன்வைத்தார். “ரூ.600 கோடிக்கும் அதிகமான சொத்துகளை வெளிப்படையாகக் கணக்கு காட்டியுள்ள உச்ச நட்சத்திரமான விஜய், அதில் ரூ.30 கோடி சொத்துக் கணக்கு விடுபட்டதற்காக அவருடைய ஒட்டுமொத்த தேர்தல் வெற்றியை செல்லாது என அறிவிக்க முடியுமா? தொழிலதிபர்களிடம் எந்தெந்த இடங்களில் சொத்துகள் உள்ளன என்பது முழுமையாக நினைவிருக்க வாய்ப்பில்லை; ஆடிட்டர் செய்த பிழைக்காக, முதல் முறையாகப் போட்டியிட்டு வென்ற ஒருவரின் வெற்றியைப் பறிக்க முடியுமா?” எனக் கேள்வி எழுப்பினார்.
அனைத்துத் தரப்பு வாதங்களும் முழுமையாக முடிவடைந்ததை தொடர்ந்து, தேர்தல் வழக்குகளை நிராகரிக்கக் கோரி விஜய் தாக்கல் செய்த மனு மீதான தீர்ப்பை வரும் அக்டோபர் 14-ஆம் தேதிக்கு ஒத்திவைத்து நீதிபதி உத்தரவிட்டுள்ளார்.
