திருச்சி மாவட்டம் லால்குடி அருகே உள்ள வசந்தம் நகரில் வசித்து வரும் மூத்த தம்பதியினரின் வீட்டிற்கு கடந்த 6-ஆம் தேதியன்று இளம்பெண் ஒருவர் வந்துள்ளார். தனக்கு குடியிருக்க வாடகை வீடு தேவைப்படுவதாக கூறி, அந்த முதியவர்களிடம் நைசாக பேச்சு கொடுத்துள்ளார். அவர்களின் வயது முதிர்வையும் தனியாக இருப்பதையும் சாதகமாக பயன்படுத்திக் கொண்ட அப்பெண், எதிர்பாராத நேரத்தில் மூதாட்டியின் கழுத்தில் இருந்த 7 சவரன் தங்கச் சங்கிலியைப் பறித்துக் கொண்டு மின்னல் வேகத்தில் அங்கிருந்து தப்பியோடினார்.
பட்டப்பகலில் நடந்த இந்த துணிகர சம்பவத்தால் அதிர்ச்சியடைந்த முதிய தம்பதியினர், உடனடியாக லால்குடி காவல் நிலையத்தில் புகார் அளித்தனர். புகாரைத் தொடர்ந்து ஆய்வாளர் தலைமையில் அமைக்கப்பட்ட தனிப்படை போலீசார், அப்பகுதியில் பொருத்தப்பட்டிருந்த சிசிடிவி கண்காணிப்பு கேமரா பதிவுகளை தீவிரமாக ஆய்வு செய்தனர். அப்பகுதி மக்களிடம் நடத்தப்பட்ட விசாரணையின் அடிப்படையில் துப்பு துலக்கிய போலீசார், நகையைப் பறித்துச் சென்றது லால்குடி மேலவாளை பகுதியைச் சேர்ந்த உமா மகேஸ்வரி (23) என்ற பெண் என்பதை உறுதி செய்தனர்.
இதையடுத்து விரைந்து செயல்பட்ட தனிப்படையினர், புகாரளிக்கப்பட்ட 22 மணி நேரத்திற்குள் தலைமறைவாக இருந்த உமா மகேஸ்வரியை சுற்றி வளைத்துக் கைது செய்தனர். அவரிடமிருந்து பறிக்கப்பட்ட 7 சவரன் தங்க நகையும் பத்திரமாக மீட்கப்பட்டது. முதியவர்களை குறிவைத்து நடத்தப்பட்ட இந்த கொள்ளையில், துரிதமாக செயல்பட்டு குற்றவாளியைப் பிடித்த லால்குடி தனிப்படை போலீசாருக்கு அப்பகுதி மக்கள் பாராட்டு தெரிவித்தனர்.
Read More : பெரம்பூரில் முதல்வர் விஜய் வெற்றி பெற்றது செல்லுமா? அக்.14ம் தேதி தீர்ப்பு! சென்னை ஐகோர்ட் அறிவிப்பு!
