ஒரு மொறுமொறுப்பான தோசையை விரும்பாத உணவுப் பிரியர்களே இருக்க முடியாது. பொன்னிறத்தில் வெந்துவரும் மேற்பகுதி, உள்ளே சுவையான உருளைக்கிழங்கு மசாலா, பக்கத்தில் மணக்கும் தேங்காய் சட்னி மற்றும் சுடச்சுட சாம்பார் ஆகியவை சாதாரண காலை உணவை ஒரு அற்புதமான விருந்தாக மாற்றிவிடும். இந்நிலையில், நம் தென்னிந்தியாவின் இந்த சிறப்பு உணவு, இந்தியாவில் இருந்து ஆயிரக்கணக்கான கிலோமீட்டர்கள் அப்பால் உள்ள அமெரிக்காவின் சீட்டில் (Seattle) நகரத்தில் மக்களின் மனங்களை வென்றுள்ளது.
கூகுள் மேப்ஸின் முதல் ‘அன்பிற்குரிய உணவுப் பட்டியல்’ (Fan-Favourite Dining List)-இன் படி, கடந்த ஆண்டில் சீட்டிலில் தோசையைக் குறிப்பிடும் கூகுள் விமர்சனங்கள் 136 சதவீதம் அதிகரித்துள்ளன. இதன் மூலம், இந்த எளிய தென்னிந்திய உணவு அங்கு வேகமாக வளர்ந்துவரும் உணவுப் போக்குகளில் ஒன்றாக மாறியுள்ளதுடன், இந்திய சமையலறைகளையும் தாண்டி அதன் செல்வாக்கு பரவி வருவதை நிரூபித்துள்ளது.
இந்தியர்களைப் பொறுத்தவரை தோசை என்பது புதியதல்ல; அது ஒரு வழக்கமான காலை உணவு மற்றும் எப்போதுமான ஃபேவரிட். ஆனால், அமெரிக்க நகரம் ஒன்றில் இது ஒரு பெரிய உணவுத் தாக்கமாக மாறுவது, நமது பாரம்பரிய உணவுகள் உலகம் முழுவதும் புதிய ரசிகர்களை எவ்வாறு ஈர்க்கின்றன என்பதற்கு சிறந்த எடுத்துக்காட்டாகும்.
கூகுள் மேப்ஸின் இந்த அறிக்கையானது, சீட்டிலில் உள்ள ‘ஸ்ரீ ஆனந்த பவன்’ (Shri Ananda Bhavan) மற்றும் ‘சென்னை எக்ஸ்பிரஸ்’ (Chennai Express) போன்ற உணவகங்களை இந்த தோசை எழுச்சியுடன் இணைத்துக் குறிப்பிடுகிறது. இந்த ஆர்வம் திடீரென அதிகரிக்கக் காரணம் என்ன என்பதை தரவுகள் முழுமையாகக் கூறாவிட்டாலும், அதிகமான உணவுப் பிரியர்கள் தங்களது விமர்சனங்களில் தோசையைப் பற்றி குறிப்பிடுவதை எண்கள் காட்டுகின்றன. கிளாசிக் மசாலா தோசை ஆனாலும் சரி அல்லது சட்னியுடன் கூடிய மொறுமொறுப்பான பிளைன் தோசை ஆனாலும் சரி, அதன் சுவையும் மொறுமொறுப்பும் அனைவரையும் ஈர்ப்பதில் ஆச்சரியமில்லை.
சீட்டிலின் தோசை மோகம் என்பது உலகளாவிய நகரங்களில் மாறிவரும் உணவு விருப்பங்களின் ஒரு சிறிய பகுதி மட்டுமே. கூகுள் மேப்ஸின் இந்தப் பட்டியல் நியூயார்க்கில் உறைந்த தயிர் (Frozen Yoghurt) குறித்தான விமர்சனங்களில் 320% அதிகரிப்பையும், டோக்கியோவில் மோச்சி (Mochi) குறித்தான பதிவுகளில் 168% வளர்ச்சியையும் காட்டுகிறது.
இதற்கிடையில், சிகாகோவில் 82% மற்றும் சாண்டியாகோவில் 84% என மட்சா (Matcha) தேநீர் மீதான ஆர்வம் அதிகரித்துள்ளது. லண்டனில் வறுத்த பச்சைத் தேநீர் வகையான ஹோஜிகா (Hojicha) குறித்தான பதிவுகள் 114% உயர்ந்துள்ள நிலையில், மெல்போர்ன் நகரில் ஊதா நிற கிழங்கான உபே (Ube) குறித்த பதிவுகள் 75% அதிகரித்துள்ளன. இந்தப் பட்டியலானது சீட்டில், நியூயார்க், லண்டன் மற்றும் டோக்கியோ உள்ளிட்ட 10 நகரங்களில் உள்ள உணவகங்களின் விமர்சனங்கள் மற்றும் மதிப்பீடுகளின் அடிப்படையில் தயாரிக்கப்பட்டுள்ளது.
இந்த 136% அதிகரிப்பு என்பது தோசையின் விற்பனை நேரடியாக அதே அளவுக்கு உயர்ந்துள்ளது என்பதைக் குறிக்கவில்லை. மாறாக, இது உணவுப் பேச்சுக்களில் ஏற்பட்டுள்ள மாற்றத்தையே காட்டுகிறது. இருப்பினும், நமது பழக்கமான இந்திய உணவு உலகின் மறுமுனையில் புதிய ரசிகர்களைப் பெறுவது மகிழ்ச்சி அளிக்கிறது. மக்களைக் கவர தோசைக்கு உலகளாவிய மாற்றங்கள் தேவையில்லை; சூடான கல், பொன்னிற மொறுமொறுப்பு மற்றும் நல்ல சட்னி இருந்தாலே போதும்!
