இந்தியா மற்றும் நியூசிலாந்து நாடுகளுக்கிடையேயான விளையாட்டு உறவு நூறாண்டுகளை எட்டியுள்ளதைக் கொண்டாடும் வகையில், நியூசிலாந்து கிரிக்கெட் அணி வரவிருக்கும் ஒருநாள் தொடரில் பிரத்யேகமான ‘கோஹிதாங்கா’ (Kotahitanga) ஜெர்சி அணிந்து களமிறங்கவுள்ளது. இந்திய கலாச்சாரத்தின் அடையாளமான தாமரை மலர்கள் மற்றும் மண்டலா கலை வடிவங்கள் இந்த புதிய ஜெர்சியில் இடம்பெற்றுள்ளது இரு நாடுகளுக்கு இடையேயான பந்தத்தை மேலும் வலுப்படுத்துவதாக அமைந்துள்ளது.
கிரிக்கெட் மீதான காதலால் இரண்டு வெவ்வேறு கலாச்சாரங்களை ஒன்றாக இணைக்கும் இந்த ‘கோஹிதாங்கா’ ஜெர்சி பென் தாமசன், சிவ நரந்தாஸ் மற்றும் ஜெய் பஞ்சா ஆகிய மூன்று கலைஞர்கள் கூட்டாக இணைந்து வடிவமைத்துள்ளனர். இதில் இந்தியாவின் தேசிய மலரான தாமரை, இந்திய பாரம்பரியக் கட்டடக்கலையில் இடம்பெறும் வடிவங்கள் மற்றும் மாவோரி வடிவமைப்புடன் இயற்கையாகப் பொருந்தும் மண்டலா கலை ஆகியவை ஒருங்கிணைக்கப்பட்டுள்ளன. மேலும், மாவோரி பாரம்பரியத்தின் சுருள் வடிவ ஓவியங்கள் மற்றும் ஹஹாய் கோடுகள் மூலம் இரு நாடுகளுக்கும் இடையிலான நீண்டகால வரலாற்றுப் பிணைப்பு பெருமைப்படுத்தப்பட்டுள்ளது.
இந்தியாவுக்கு எதிரான இந்தச் சுற்றுப்பயணம் அக்டோபர் 22-ஆம் தேதி ஐந்து போட்டிகள் கொண்ட டி20 தொடருடன் தொடங்குகிறது. அதனைத் தொடர்ந்து நவம்பர் 4-ஆம் தேதி முதல் ஐந்து போட்டிகள் கொண்ட ஒருநாள் தொடர் நடைபெற உள்ளது. இந்தச் சிறப்புமிக்க ஜெர்சி இரு நாட்டு ரசிகர்களால் என்றென்றும் பொக்கிஷமாகப் போற்றப்படும் ஒரு சேகரிப்பாக அமையும் என நியூசிலாந்து கிரிக்கெட் வாரியம் நம்பிக்கை தெரிவித்துள்ளது.
