தென்மேற்கு வங்கக்கடலில் நிலவும் வளிமண்டல மேலடுக்கு சுழற்சி மற்றும் பருவமழை தீவிரம் காரணமாக, தென் மாவட்டங்களில் பரவலாக கனமழை பெய்து வருகிறது. குறிப்பாக தென்காசி மாவட்டம் மற்றும் மேற்கு தொடர்ச்சி மலை நீர்ப்பிடிப்பு பகுதிகளில் நேற்று இரவு தொடங்கிய கனமழை, விடிய விடிய இடைவிடாது வெளுத்து வாங்கியது. இதனால் வனப்பகுதிகளில் உள்ள நீரோடைகள் மற்றும் ஆறுகளில் திடீர் காட்டாற்று வெள்ளம் பெருக்கெடுத்து ஓடுகிறது.
இந்த தொடர் மழையின் எதிரொலியாக குற்றாலத்தில் உள்ள அனைத்து அருவிகளிலும் நீர்வரத்து அபாயகரமான அளவிற்கு அதிகரித்துள்ளது. மெயின் அருவி, பழைய குற்றாலம், ஐந்தருவி, புலி அருவி மற்றும் சிற்றருவி என அனைத்து அருவிகளிலும் தண்ணீர் ஆக்ரோஷமாக ஆர்ப்பரித்துக் கொட்டுகிறது. குறிப்பாக மெயின் அருவியில் ஆர்ச்சை தாண்டி பாதுகாப்பு வளையத்திற்கு வெளியே தண்ணீர் வழிந்தோடும் அளவிற்கு வெள்ளப்பெருக்கு ஏற்பட்டுள்ளதால், பாதுகாப்பு காரணங்களுக்காக சுற்றுலா பயணிகள் அருவிகளில் இறங்கி குளிக்க மாவட்ட நிர்வாகம் மற்றும் காவல்துறை சார்பில் உடனடி தடை விதிக்கப்பட்டுள்ளது.
விடுமுறை தினத்தை முன்னிட்டு குடும்பத்துடன் குற்றாலத்திற்கு வருகை தந்திருந்த ஏராளமான சுற்றுலா பயணிகள், அருவிகளில் குளிக்க முடியாமல் ஏமாற்றத்துடன் கரைகளில் நின்றபடி வெள்ளப்பெருக்கை தூரத்திலிருந்து வேடிக்கை பார்த்து வருகின்றனர். அருவிப் பகுதிகளில் காவலர்கள் தீவிர ரோந்து பணியில் ஈடுபட்டு மக்களை நீர்நிலைகளுக்கு அருகில் செல்லாதவாறு கண்காணித்து வருகின்றனர். மலைப்பகுதிகளில் மழைப்பொழிவு தணிந்து நீர்வரத்து இயல்பு நிலைக்கு திரும்பிய பிறகே, அருவிகளில் குளிக்க மீண்டும் அனுமதி வழங்கப்படும் என மாவட்ட நிர்வாகம் தரப்பில் தெரிவிக்கப்பட்டுள்ளது.
