குடும்ப அட்டைதாரர்களுக்கு குட் நியூஸ்…!ஆண்டுக்கு 3 இலவச கேஸ் சிலிண்டர்கள் வழங்க திட்டம்!

gas booking

சென்னை: தமிழகத்தில் குடும்ப அட்டைதாரர்களுக்கு ஆண்டுதோறும் இலவசமாக 3 சமையல் எரிவாயு சிலிண்டர்கள் வழங்கும் திட்டத்தைச் செயல்படுத்துவதற்கான முன்னேற்பாடுகளை அரசு மேற்கொண்டு வருகிறது. இத்திட்டத்தின் மூலம் ஒரு கோடிக்கும் அதிகமான குடும்பங்கள் பயனடைவார்கள் என எதிர்பார்க்கப்படுகிறது.


தேர்தல் வாக்குறுதியை நிறைவேற்றும் முயற்சி

தமிழக வெற்றிக் கழகம் தனது தேர்தல் வாக்குறுதியில், ஆட்சிக்கு வந்தால் ஒவ்வொரு குடும்பத்திற்கும் ஆண்டுக்கு 6 இலவச சமையல் எரிவாயு சிலிண்டர்கள் வழங்கப்படும் என அறிவித்திருந்தது. இதன் முதற்கட்டமாக ஆண்டுக்கு 3 சிலிண்டர்களை இலவசமாக வழங்கும் திட்டம் செயல்படுத்தப்படும் என்றும், இதன் வாயிலாக சுமார் 1.30 கோடி குடும்பங்கள் பயன்பெறும் என்றும் சட்டப்பேரவையில் முதலமைச்சர் விஜய் அறிவித்ததாகத் தெரிவிக்கப்பட்டுள்ளது.

பயனாளிகள் பட்டியல் தயாரிப்பு

இத்திட்டத்தின் பலன்களைப் பெறத் தகுதியான குடும்பங்களை அடையாளம் காணும் நடவடிக்கையில் அரசு ஈடுபட்டுள்ளது. இதற்காக ஏற்கெனவே செயல்பாட்டில் உள்ள நலத்திட்டங்களின் பயனாளிகள் விவரங்கள் பரிசீலிக்கப்பட்டு வருகின்றன. குறிப்பாக, பிரதமரின் உஜ்வாலா திட்டத்தின் கீழ் சமையல் எரிவாயு இணைப்பு பெற்றவர்கள், கலைஞர் மகளிர் உரிமைத்தொகை திட்டத்தில் மாதந்தோறும் ரூ.1,000 பெறுபவர்கள் மற்றும் ஆண்டுக்கு ரூ.2.50 லட்சம் வரை வருமானம் கொண்ட குடும்பங்கள் ஆகியோரின் தகவல்கள் கணக்கில் எடுத்துக்கொள்ளப்படுவதாகக் கூறப்படுகிறது.

வங்கிக் கணக்கில் நேரடியாகப் பணம்

இலவச சிலிண்டருக்கான தொகையைப் பயனாளிகளின் வங்கிக் கணக்கில் நேரடியாகச் செலுத்தும் முறையைப் பின்பற்ற அரசு திட்டமிட்டுள்ளதாகத் தகவல்கள் தெரிவிக்கின்றன. மேலும், ஏற்கெனவே உள்ள அரசு நலத்திட்டங்களின் தரவுகள் மட்டுமின்றி, குடும்பங்களிடமிருந்து தனியாக விண்ணப்பங்களைப் பெற்று தகுதியானவர்களைத் தேர்வு செய்வது குறித்தும் ஆலோசிக்கப்பட்டு வருகிறது.

ஒரு கோடிக்கும் அதிகமான குடும்பங்களுக்கு வாய்ப்பு

தமிழகத்தில் தற்போது சுமார் 2.40 கோடி வீட்டு உபயோக சமையல் எரிவாயு இணைப்புகள் உள்ளன. அவற்றில் சுமார் 1.10 கோடி குடும்பங்கள் ஒற்றை சிலிண்டர் இணைப்புகளைப் பயன்படுத்துகின்றன. இதில் 42 லட்சம் இணைப்புகள் உஜ்வாலா திட்டத்தின் வாயிலாக வழங்கப்பட்டவை எனத் தெரிவிக்கப்பட்டுள்ளது. பயனாளிகள் தேர்வுப் பணிகள் முடிவடைந்த பின்னர், இலவச கேஸ் சிலிண்டர் திட்டத்தைச் செயல்படுத்துவதற்கான அடுத்தகட்ட நடவடிக்கைகள் மேற்கொள்ளப்படும் என எதிர்பார்க்கப்படுகிறது.

Newsnation_Admin

Next Post

வெளியான முதல் நாளிலேயே ரூ.21,952 கோடி வசூல்! உலகையே திரும்பிப் பார்க்க வைத்த GTA 6!

Sat Nov 21 , 2026
உலகம் முழுவதும் பெரிதும் எதிர்பார்க்கப்பட்ட GTA 6 வீடியோ கேம் வெளியான ஒரே நாளில் ரூ. 21,952 கோடி வசூல் செய்து புதிய வரலாறு படைத்துள்ளது.
gta6

You May Like