சூர்யா நடிப்பில், வெங்கி அட்லூரி இயக்கத்தில் வெளியாகியுள்ள ‘விஸ்வநாத் அண்ட் சன்ஸ்’ திரைப்படம் பாக்ஸ் ஆபிஸில் சிறப்பான வரவேற்பை பெற்று வருகிறது. சுதந்திர தின விடுமுறை நாட்களைப் பயன்படுத்தி திரையரங்குகளில் மக்கள் கூட்டம் அலைமோதுகிறது.
சாக்னில்க் (Sacnilk) தரவுகளின்படி, தமிழ் மற்றும் தெலுங்கு சந்தைகளில் அமோக வரவேற்பைப் பெற்றுள்ள இப்படம், இரண்டாம் நாளில் இந்தியாவில் ரூ.22.25 கோடி நெட் வசூலித்துள்ளது. இது முதல் நாள் வசூலான ரூ.15.35 கோடியை விட 45 சதவீத வளர்ச்சியாகும். முதல் இரண்டு நாட்களில் இப்படத்தின் இந்தியாவின் மொத்த நெட் வசூல் ரூ.37.60 கோடியை எட்டியுள்ளது. மேலும், கடந்த இரண்டு நாட்களில் உலகளவில் இப்படம் ரூ.74.47 கோடியைக் கடந்துள்ளது.
மொழி வாரியான வசூலைப் பொறுத்தவரை, இரண்டாம் நாளில் தமிழ் பதிப்பு ரூ.13.75 கோடியும், தெலுங்கு பதிப்பு ரூ.8.50 கோடியும் வசூலித்துள்ளன. திரையரங்குகளில் முறையே 56% மற்றும் 64% அளவுக்கு பார்வையாளர்கள் வருகை பதிவாகியுள்ளது.
மாநில வாரியான இரண்டாம் நாள் கிராஸ் வசூல் நிலவரப்படி, தமிழ்நாட்டில் ரூ.10.75 கோடியும், ஆந்திரா மற்றும் தெலுங்கானாவில் ரூ.9.50 கோடியும் வசூலிக்கப்பட்டுள்ளது. மேலும், கர்நாடகாவில் ரூ.3.25 கோடியும், கேரளாவில் ரூ.1.75 கோடியும், இந்தியாவின் பிற பகுதிகளில் ரூ.48 லட்சமும் வசூலாகியுள்ளது.
வெளிநாட்டு சந்தைகளில் மட்டும் இரண்டாம் நாளில் ரூ.17 கோடி வசூலிக்கப்பட்டுள்ளதுடன், ஒட்டுமொத்த வெளிநாட்டு வசூல் ரூ.31 கோடியை எட்டியுள்ளது. ஞாயிற்றுக்கிழமை விடுமுறை நாளிலும் படத்தின் வசூல் மேலும் அதிகரிக்கும் என எதிர்பார்க்கப்படுகிறது.
சித்தாரா என்டர்டெயின்மெண்ட்ஸ் மற்றும் பார்ச்சூன் ஃபோர் சினிமாஸ் தயாரிப்பில் உருவாகியுள்ள இப்படத்தில், சூர்யாவுடன் மமிதா பைஜூ, ராதிகா சரத்குமார் மற்றும் ரவீணா டாண்டன் ஆகியோர் முக்கிய கதாபாத்திரங்களில் நடித்துள்ளனர். இதில் சூர்யா தொழிலதிபர் மற்றும் தொழில்முறை துப்பாக்கி சுடும் வீரரான ‘சஞ்சய் விஸ்வநாத்’ என்ற வேடத்தில் நடித்துள்ளது குறிப்பிடத்தக்கது.
