காரைக்காலில் ஒன்றரை ஆண்டுக்குப்பின் கொரோனா தொற்று பாதிப்பால் பெண் ஒருவர் உயிரிழந்துள்ள சம்பவம் பீதியை ஏற்படுத்தியுள்ளது.
நாட்டில் கடந்த சில வாரங்களுக்கு முன்பு 100-க்கும் கீழ் இருந்த கொரோனா பாதிப்பு, தற்போது 3 ஆயிரத்தை கடந்துள்ளது. தமிழ்நாட்டிலும் கொரோனா பரவல் அதிகரித்து வருகிறது. இதனைத் தொடர்ந்து தமிழகத்தில் அரசு மருத்துவமனைகளில் முகக்கவசம் அணிவது கட்டாயமாக்கப்பட்டு உள்ளது. கொரோனாவை கட்டுப்படுத்த பல்வேறு முன்னெச்சரிக்கை நடவடிக்கைகளும் எடுக்கப்பட்டு வருகிறது. இதற்கிடையே, காரைக்கால் மாவட்டத்தில் ஒரு ஆண்டுக்கு பிறகு மீண்டும் தற்போது கொரோனா தொற்று ஏற்பட்டுள்ளது. கடந்த 3 நாட்களில் 20-க்கும் மேற்பட்டவருக்கு கொரோனா பதிவாகியுள்ள நிலையில், தடுப்பு பணிகள் மேற்கொள்ளப்பட்டு வருகிறது.
இந்நிலையில், காரைக்காலில் ஒன்றரை ஆண்டுகளுக்கு பிறகு கொரோனா தொற்றால் உயிரிழப்பு ஏற்பட்டு உள்ளது. காரைக்கால் அரசு மருத்துவமனையில் சிகிச்சையில் இருந்த பெண், மேல் சிகிச்சைக்காக புதுச்சேரி ஜிப்மர் மருத்துவமனையில் அனுமதிக்கப்பட்ட நிலையில், சிகிச்சை பலனின்றி உயிரிழந்துள்ளார். காரைக்காலில் ஒன்றரை ஆண்டுகளுக்கு பிறகு கொரோனா மரணத்தால் அப்பகுதிமக்கள் அச்சத்தில் உள்ளனர்.
