மாலை நேரங்களில் சாலையோர கடைகளில் இருந்து வீசும் கோபி மஞ்சூரியனின் மணம் யாரையும் சுண்ட இழுக்கும். ஆனால், அந்த நாவூறும் சுவைக்கு பின்னால் ஒரு மெல்லக் கொல்லும் நச்சு ஒளிந்திருப்பதாக சுகாதார நிபுணர்கள் எச்சரிக்கின்றனர். வெறும் சுவைக்காக நாம் விரும்பி உண்ணும் இந்த துரித உணவு, நம் உடலுக்குள் எத்தகைய பேராபத்துகளை விதைக்கிறது என்பதை இந்தப் பதிவில் பார்ப்போம்.
மூளையை சிதைக்கும் அஜினோமோட்டோ : மஞ்சூரியனின் ருசியை அதிகரிக்க ‘அஜினோமோட்டோ’ (MSG) தாராளமாக சேர்க்கப்படுகிறது. இது நரம்பு மண்டலத்தை சிதைத்து மூளையின் செயல்பாட்டை மந்தமாக்கும் வல்லமை கொண்டது. இதைத் தொடர்ந்து உட்கொள்வதால் தீராத தலைவலி, குமட்டல் மற்றும் மார்பு வலி போன்ற உபாதைகள் ஏற்படுகின்றன. குறிப்பாக, வளரும் குழந்தைகளின் மூளை வளர்ச்சியை இது கடுமையாக பாதிக்கும் என்பதால் பெற்றோர்கள் எச்சரிக்கையுடன் இருப்பது அவசியம்.
வண்ணப் பூச்சும் புற்றுநோய் அபாயமும் : கோபி மஞ்சூரியன் பளிச்சென்று சிவப்பு நிறத்தில் தெரிவதற்காக சேர்க்கப்படும் செயற்கை சாயங்கள் செரிமான மண்டலத்தைப் பதம்பார்க்கின்றன. இத்தகைய ஆபத்தான வேதிப்பொருட்கள் நீண்ட கால அடிப்படையில் கல்லீரல் மற்றும் சிறுநீரகத்தின் செயல்பாட்டை முடக்குவதோடு, புற்றுநோய் செல்கள் உருவாவதற்கும் காரணியாக அமைகின்றன. சமீபகாலமாக அதிகரித்து வரும் இரைப்பை புற்றுநோய்க்கு இத்தகைய நிறமூட்டிகள் ஒரு முக்கியக் காரணம் என்று ஆய்வுகள் சுட்டிக்காட்டுகின்றன.
மறுசுழற்சி எண்ணெய் மற்றும் மைதாவின் தாக்கம் : சாலையோர கடைகளில் செலவை குறைக்க ஒரே எண்ணெயை மீண்டும் மீண்டும் கொதிக்க வைத்துப் பயன்படுத்துகின்றனர். இவ்வாறு கருகிய எண்ணெயில் உருவாகும் ‘டிரான்ஸ் ஃபேட்’ (Trans fat) இதய ரத்த நாளங்களில் அடைப்பை ஏற்படுத்தி மாரடைப்புக்கு வழிவகுக்கும். இதனுடன் சேர்க்கப்படும் மைதா மாவு, உடலில் ரத்தச் சர்க்கரை அளவை எகிறச் செய்து, உடல் பருமன் மற்றும் நீரிழிவு போன்ற நோய்களை மிகச் சிறு வயதிலேயே வரவழைக்கிறது.
சுகாதாரமற்ற காலிஃபிளவர் : பல நேரங்களில் காலிஃபிளவர் சரியாக சுத்தப்படுத்தப்படாமலேயே சமைக்கப்படுகிறது. காலிஃபிளவரில் மறைந்திருக்கும் நுண் புழுக்கள் மற்றும் பாக்டீரியாக்கள் உயிருக்கே ஆபத்தான டைபாய்டு, காலரா போன்ற தொற்றுநோய்களைப் பரப்பும் அபாயம் உள்ளது. முறையான சுகாதாரம் இல்லாத இடங்களில் சமைக்கப்படும் இத்தகைய உணவுகள் குடல் அலர்ஜியை தீவிரப்படுத்தும்.
எனவே, நாவிற்கு சுவை தரும் வண்ணமயமான வெளிநாட்டு துரித உணவுகளை தவிர்த்து, வீட்டிலேயே காய்கறிகளை கொண்டு சத்தான உணவுகளை சமைத்து உண்பதே புத்திசாலித்தனம். “உணவே மருந்து” என்ற பழமொழியை மறந்து “சுவையே நஞ்சு” என்று மாறுவதற்கு முன் விழிப்புணர்வுடன் இருப்போம்.
