ஓமன் நாட்டு கடற்பகுதியில், இந்தியாவை நோக்கி வந்து கொண்டிருந்த ‘எம்.வி கேப் டாவ்’ (MV Cape Dao) என்ற வணிகக் கப்பல் மீது நடத்தப்பட்ட தாக்குதலில் இந்தியர் மாலுமி உயிரிழந்துள்ளதாக ஓமனில் உள்ள இந்திய தூதரகம் தெரிவித்துள்ளது.
“இந்தத் தாக்குதலில் இந்தியர் ஒருவர் உயிரிழந்தது எங்களுக்கு மிகுந்த வருத்தத்தை அளிக்கிறது. உயிரிழந்தவரின் குடும்பத்தினருக்கு எங்களது ஆழ்ந்த இரங்கலைத் தெரிவித்துக் கொள்கிறோம்,” என்று இந்திய தூதரகம் X தளத்தில் பதிவிட்டுள்ளது.
இந்தக் கப்பலை தாக்கியது யார் என்பது இதுவரை தெளிவாகத் தெரியவில்லை. சம்பந்தப்பட்ட முகமையுடனும் (RPSL) உயிரிழந்தவரின் குடும்பத்தினருடனும் தொடர்பில் இருப்பதாகவும், தொடர்ந்து ஒருங்கிணைப்புப் பணிகளை மேற்கொண்டு வருவதாகவும் தூதரகம் தெரிவித்துள்ளது.
இதற்கிடையே, இந்தத் தாக்குதலுக்கு கடும் கண்டனம் தெரிவித்துள்ள இந்தியா, வணிகக் கப்பல்கள், மாலுமிகள் மற்றும் பொதுமக்கள் சார்ந்த கட்டமைப்புகளை குறிவைத்து தாக்குதல் நடத்துவது உடனடியாக முடிவுக்கு வர வேண்டும் என்று வலியுறுத்தியுள்ளது.
‘எம்.வி கேப் டாவ்’ கப்பலில் பயணம் செய்த 20 இந்திய மாலுமிகளில் 19 பேர் பத்திரமாக மீட்கப்பட்டுள்ளனர். நிலைமையை உன்னிப்பாகக் கண்காணித்து வருவதாகவும், மீட்கப்பட்டவர்களை விரைவாக தாய்நாடு திருப்புவதற்காக மஸ்கட்டில் உள்ள இந்திய தூதரகம் ஓமன் அதிகாரிகளுடன் இணைந்து தீவிரமாக செயல்பட்டு வருகிறது என்றும் இந்திய வெளியுறவுத்துறை அமைச்சகம் (MEA) தெரிவித்துள்ளது.
“ஓமன் கிழக்கு கடற்கரைக்கு அப்பால் எம்.வி கேப் டாவ் வணிகக் கப்பல் மீது இன்று நடத்தப்பட்ட தாக்குதலை நாங்கள் வன்மையாகக் கண்டிக்கிறோம். கப்பலில் இருந்த 20 இந்திய மாலுமிகளில் 19 பேர் மீட்கப்பட்டுள்ளனர், அதேவேளையில் ஒரு இந்தியர் பரிதாபமாக உயிரிழந்தார். அவரது குடும்பத்திற்கு ஆழ்ந்த இரங்கலைத் தெரிவித்துக் கொள்கிறோம்,” என்று வெளியுறவுத்துறை அறிக்கையில் கூறப்பட்டுள்ளது.
அப்பகுதியில் வணிகக் கப்பல்கள் மீது தொடர்ந்து நடத்தப்படும் இதுபோன்ற தாக்குதல்கள் “மிகவும் கவலையளிக்கக்கூடியவை” என்று அமைச்சகம் சுட்டிக்காட்டியுள்ளது.
“பதற்றத்தைத் தணிக்கவும், பிராந்தியத்தில் அமைதியை விரைவாகத் திரும்பக் கொண்டுவரவும் பேச்சுவார்த்தை மற்றும் ராஜதந்திர நடவடிக்கைகளுக்கான எங்களது அழைப்பை மீண்டும் வலியுறுத்துகிறோம்,” என்று இந்திய வெளியுறவுத்துறை கூறியுள்ளது.
“வணிகக் கப்பல்கள், மாலுமிகள் மற்றும் பொதுமக்கள் சார்ந்த கட்டமைப்புகளை குறிவைப்பது நிறுத்தப்பட வேண்டும். பிராந்தியத்தில் உள்ள சர்வதேச நீர்வழிப்பாதைகள் வழியாக தடையற்ற மற்றும் சுதந்திரமான போக்குவரத்து மற்றும் வர்த்தகம் விரைவில் மீட்டமைக்கப்பட வேண்டும்,” என்றும் அது தெரிவித்துள்ளது.
இந்தத் தாக்குதல் சம்பவத்தை தொடர்ந்து கண்காணித்து வருவதாகவும், மீட்கப்பட்ட 19 இந்தியர்கள் உட்பட அனைத்து மாலுமிகளின் பாதுகாப்பை உறுதி செய்வதில் ஓமன் அதிகாரிகளுடன் ஒருங்கிணைந்து செயல்பட்டு வருவதாகவும் தூதரகம் கூறியுள்ளது. இந்த விவகாரத்தில் ஆதரவளித்த ஓமன் அதிகாரிகளுக்கும் இந்திய வெளியுறவுத்துறை அமைச்சகம் நன்றி தெரிவித்துள்ளது.
