அமெரிக்க அதிபர் டொனால்ட் டிரம்ப், நாட்டின் முன்னணி ஊடகங்களான சிஎன்என், எம்.எஸ். நவ் மற்றும் பாலிடிகோ (Politico) ஆகிய ஊடகங்களுக்கு வெள்ளை மாளிகைக்குள் நுழையத் தடை விதித்ததைக் கண்டித்து, அமெரிக்காவின் முக்கிய தொலைக்காட்சி நிறுவனங்கள் இணைந்து டிரம்பின் வெள்ளை மாளிகை நிகழ்வுகளை வீடியோ பதிவு செய்யும் Pool சேவை ஒளிபரப்பை நிறுத்தி எதிர்ப்பைப் பதிவு செய்துள்ளன.
ஏபிசி (ABC), சிபிஎஸ் (CBS), சிஎன்என் (CNN), ஃபாக்ஸ் (Fox) மற்றும் என்பிசி (NBC) ஆகிய நாட்டின் முக்கிய ஐந்து ஒளிபரப்பு நிறுவனங்களும் ஒன்றிணைந்து, சிஎன்என் செய்தி நிறுவனத்திற்கு ஆதரவாக இந்த முடிவை எடுத்துள்ளன. திங்கள்கிழமை வெள்ளை மாளிகை நிகழ்வுகளை வீடியோ பதிவு செய்ய வேண்டிய பொறுப்பு சிஎன்என் வசமிருந்த நிலையில், அனைத்து ஊடகங்களும் இணைந்து நேரடி வீடியோ பதிவையே நிறுத்தின.
அரசின் நடவடிக்கைகள் குறித்துத் துல்லியமான, சுதந்திரமான தகவல்களைப் பெறுவது மக்களுக்கு மிக முக்கியமானது என்றும், செய்திகளை விரும்பாத காரணத்திற்காக எந்தவொரு ஊடகத்தையும் நிர்வாகம் தடுத்து நிறுத்தக் கூடாது என்றும் அனைத்து ஊடகங்களும் இணைந்து கூட்டறிக்கை வெளியிட்டுள்ளன. இதனால் நியூயார்க்கில் நடைபெற்ற ஐக்கிய நாடுகள் பொதுச் சபைக் கூட்டத்தில் டிரம்ப் பங்கேற்ற நிகழ்வுகளின் வழக்கமான தொலைக்காட்சி ஒளிபரப்பு பாதிக்கப்பட்டது.
வெள்ளை மாளிகைக்குள் நுழையத் தடை விதிக்கப்பட்ட சிஎன்என், எம்.எஸ். நவ் மற்றும் பாலிடிகோ ஆகிய ஊடகங்கள் நீதிமன்றத்தில் வழக்குத் தொடர்ந்துள்ளன. தங்கள் பத்திரிகையாளர் அடையாள அட்டைகள் முன்அறிவிப்பின்றி பறிக்கப்பட்டதாகவும், இது அமெரிக்க அரசியலமைப்பின் முதலாவது திருத்தம் (First Amendment) வழங்கும் பேச்சு சுதந்திரம் மற்றும் பத்திரிகை சுதந்திரத்தை நேரடியாகப் பாதிப்பதாகவும் குற்றம் சாட்டியுள்ளன.
இருப்பினும் அதிபர் டிரம்ப் தனது நிலைப்பாட்டை மாற்றிக்கொள்ளவில்லை. தான் பத்திரிகை சுதந்திரத்தை மதிப்பதாகவும், ஆனால் “போலிச் செய்திகள்” (Fake News) புற்றுநோய் போலப் பரவி வருவதால் அதற்கு எதிராகவே இந்த நடவடிக்கை எடுக்கப்பட்டுள்ளதாகவும் தனது சோஷியல் மீடியா பக்கத்தில் தெரிவித்துள்ளார். துணை அதிபர் ஜே.டி. வான்ஸ் கூறுகையில், இந்த ஊடகங்கள் இடதுசாரி பிரச்சாரத்தைப் பரப்பி வருவதாகக் குற்றம் சாட்டினார்.
கடந்த சில ஆண்டுகளாகவே தங்களை விமர்சித்துச் செய்தி வெளியிடும் ஊடகங்களை “மக்களின் எதிரி” என விமர்சித்து வந்த டிரம்ப், தற்போது இந்தத் தடையை தீவிரப்படுத்தியுள்ளார். வெள்ளிக்கிழமை பிறப்பிக்கப்பட்ட இந்தத் திடீர் உத்தரவைத் தொடர்ந்து, சனிக்கிழமை செய்தி சேகரிக்கச் சென்ற நிருபர்கள் திருப்பி அனுப்பப்பட்டதால் அமெரிக்க ஊடக உலகிற்கும் அதிபர் நிர்வாகத்திற்கும் இடையிலான மோதல் உச்சக்கட்டத்தை எட்டியுள்ளது.
