மகாராஷ்டிரா மாநிலத்தில் சிவசேனா கட்சியின் சின்னத்தை முடக்கி தேர்தல் ஆணையம் அதிரடி நடவடிக்கை எடுத்துள்ளது.
முன்னாள் முதல்வர் உத்தவ் தாக்கரே அணிக்கும், தற்போதைய முதல்வர் ஏக்நாத் ஷிண்டே அணிக்கும் இடையே ஏற்பட்ட மோதலுக்கு மத்தியில், தேர்தல் ஆணையம் சிவசேனா கட்சியின் சின்னத்தை முடக்கியது. அந்தேரி கிழக்கு இடைத்தேர்தலில் ‘சிவசேனா’வுக்கு ஒதுக்கப்பட்ட வில் மற்றும் அம்பு சின்னத்தை இரண்டு குழுக்களும் பயன்படுத்த அனுமதிக்கக்கூடாது என்று தேர்தல் ஆணையம் இடைக்கால உத்தரவு பிறப்பித்துள்ளது.
இந்த இடைக்கால உத்தரவில், மூன்று வெவ்வேறு பெயர் தேர்வுகள் மற்றும் அந்தந்த குழுக்களுக்கு ஒதுக்கீடு செய்வதற்கான பல இலவச சின்னங்களை திங்கள்கிழமைக்குள் பரிந்துரைக்குமாறு ஆணையம் கேட்டுக் கொண்டது. மகாராஷ்டிரா மாநிலம் அந்தேரி கிழக்கு சட்டமன்ற தொகுதிக்கான இடைத்தேர்தல் நெருங்கி வருவதால் சின்னத்தை ஒதுக்கக் கோரிய ஷிண்டே அணி வைத்த கோரிக்கையின் பேரில் இந்த இடைக்கால உத்தரவு பிறப்பித்துள்ளது.
தேர்தல் ஆணையத்தின் உத்தரவின்படி, தற்போதைய இடைத்தேர்தல்களின் நோக்கங்களுக்காக, தேர்தல் கண்காணிப்பு அமைப்பால் அறிவிக்கப்பட்ட இலவச சின்னங்களின் பட்டியலிலிருந்து, இரு பிரிவினருக்கும் வெவ்வேறு வாக்குச் சின்னங்கள் ஒதுக்கப்படும். இடைத்தேர்தலின் அனைத்து தேர்தல் நடவடிக்கைகளும் குழப்பம் மற்றும் முரண்பாடுகள் இல்லாமல் இருப்பதை உறுதி செய்ய வேண்டும் என உத்தரவில் கூறப்பட்டுள்ளது.
