பாஜகவின் தேசிய ஜனநாயக கூட்டணியில் இருந்து விலகுவதாக அதிமுக மாவட்ட செயலாளர்கள் கூட்டத்தில் முடிவு செய்யப்பட்டுள்ளது.
கடந்த சில நாட்களாக பாஜக மாநில தலைவர் அண்ணாமலை, முன்னாள் முதலமைச்சர்கள் அண்ணாதுரை மற்றும் ஜெயலலிதா ஆகியோர் குறித்து தெரிவித்த கருத்துக்கள் அதிமுகவினர் மத்தியில் பெரும் கொந்தளிப்பை ஏற்படுத்தியது. இதனால் பாஜகவுடனான கூட்டணியை முறித்துக்கொள்ள வேண்டும் என அக்கட்சியின் மூத்த தலைவர்கள் தொடர்ந்து வலியுறுத்தி வந்தனர்.
இந்நிலையில், இந்த விவகாரம் குறித்து முடிவெடுப்பதற்காக சென்னை அதிமுக தலைமை அலுவலகத்தில் மாவட்ட செயலாளர்கள் கூட்டம், பொதுச்செயலாளர் எடப்பாடி பழனிசாமி தலைமையில் நடைபெற்றது. இதில் அதிமுகவின் மாவட்ட செயலாளர்கள், சட்டமன்ற உறுப்பினர்கள், மாநிலங்களவை உறுப்பினர்கள் உள்ளிட்டோர் பங்கேற்றனர்.
இதில் பாஜகவுடனான கூட்டணியை தொடர்வதா அல்லது முடித்துக்கொள்வதா என விவாதிக்கப்பட்டது. இறுதியில் பாஜக மற்றும் தேசிய ஜனநாயக கூட்டணியில் இருந்து விலகுவதாக ஏகமனதாக முடிவு செய்யப்பட்டு தீர்மானம் நிறைவேற்றப்பட்டது. இதுதொடர்பாக செய்தியாளர்களிடம் பேசிய கே.பி.முனுசாமி, அண்ணா மற்றும் ஜெயலலிதா குறித்தும், எடப்பாடி பழனிசாமி குறித்தும் தொடர்ந்து அவதூறாக பேசி வருவதை ஏற்றுக்கொள்ள முடியாது.
அனைத்து தொண்டர்களின் உணர்வுகளுக்கும் மதிப்பளிக்கும் வகையில் பாஜகவுடனான கூட்டணியை முறித்துக்கொண்டு, தேசிய ஜனநாயக கூட்டணியில் இருந்து வெளியேறுவது என முடிவு செய்யப்பட்டுள்ளது. 2024ம் ஆண்டு நடைபெறும் நாடாளுமன்ற தேர்தலில் அதிமுக தலைமையில் கூட்டணி அமைத்து தேர்தலை எதிர்கொள்ள இருக்கிறோம்“ என்று தெரிவித்தார்.
