Akshay Trithiya: அட்சய திருதியை தினம் தங்கம் உள்ளிட்ட மங்கல பொருட்கள் வாங்குவதற்கு மட்டுமல்ல தானம் கொடுப்பதற்கும் ஏற்ற நாளாகும். அட்சய திருதியை நாளில் தங்கம் போன்றவற்றை வாங்கி தானம் வழங்க வேண்டும் என்பார்கள். ஆனால் இப்போதுள்ள காலத்தில் அது முடியாது என்பதால் இந்த நாளில் அரிசி, உப்பு, மஞ்சள் போன்ற மங்கள பொருட்களை வாங்கி, ஏழைகளுக்கு தானம் செய்யலாம்.
அட்சய திருதியை அன்று எதுவும் வாங்க முடியாதவர்கள் கண்டிப்பாக கல் உப்பு மட்டுமாவது வாங்கி வீட்டில் வைக்க வேண்டும். இந்த நாளில் மகாவிஷ்ணுவையும், மகாலட்சுமியையும் அதிகாலையில் வணங்க வேண்டும். பாயசம் நைவேத்தியமாக செய்து படைக்க வேண்டும்.
அட்சய திருதியை என்பது இந்தியாவில் இந்துக்களால் கொண்டாடப்படும் முக்கியமான மங்கல நாளாகும். இந்துக்கள் மட்டுமின்றி சமணர்களாலும் கொண்டாடப்படும் ஒரு புனித நாளாக அட்சய திருதியை உள்ளது. சித்திரை மாதம் வளர்பிறையில் வரும் திருதியை நட்சத்திரம் அட்சய திருதியையாக கொண்டாடப்படுகிறது. 2024 ம் ஆண்டில் நாளை (மே 10ம் தேதி) வெள்ளிக்கிழமை அட்சய திருதியை தினம் கொண்டாடப்பட உள்ளது.
அட்சய திருதியை நாள் என்றாலே தங்கம் வாங்குவதற்கு ஏற்ற மங்கலகரமான நாள் என்று மட்டும் தான் பலருக்கும் தெரியும். ஆனால் இந்த நாளில் வேறு என்னவெல்லாம் சிறப்பு உள்ளது, எதற்காக இந்த நாளில் தங்கம் அல்லது ஏதாவது ஒரு மங்கல பொருளை வீட்டில் வாங்கி வைக்க வேண்டும் என சொல்கிறார்கள் என பலருக்கும் தெரியாது.
அட்சய திருதியை என்றால் என்ன? அட்சய என்றால் அள்ள அள்ள குறையாத என்று பொருள். 15 நாட்களுக்கு ஒருமுறை சுழற்சி முறையில் வரும் திதிகளில் மூன்றாவது திதியாக வருவது திருதியை. திருதியை என்ற சொல் மூன்றாவது என்பதை குறிப்பதாகும். அட்சய திருதியை நாளில் தான் கிருதயுகம் தோன்றியதாக பவிஷ்யோத்தர புராணம் சொல்கிறது. பகீரதன் தவம் செய்து, கங்கையை பூமிக்கு கொண்டு வந்த நாளும் இந்த அட்சய திருதியை நாளில் தான்.
அட்சய திருதியை சிறப்புக்கள் :மகாலட்சுமி தவம் செய்து, திருமாலின் திருமார்பில் நிரந்தரமாக இடம் பிடித்ததும் இந்த அட்சய திருதியை நாளில் தான். குபேரன், செல்வத்திற்கு அதிபதியாக மகாலட்சுமியிடம் இருந்து வரம் பெற்றதும், பிட்சாடனராக வந்த சிவ பெருமான் தனது பசி பிணி தீர அன்னபூரணியிடம் தனது யாசக பாத்திரம் நிரம்பப் பெற்றதும் இதே அட்சய திருதியை நாளில் தான். மகாவிஷ்ணுவின் 6வது அவதாரமான பரசுராமர் அவதாரம் செய்ததும் இந்த நாளில் தான்.
அமாவாசையில் இருந்து மூன்றாவதாக வரும் திதி திருதியை. மூன்றாவது எண்ணுக்குரிய அதிபதி குரு பகவான் ஆவார். இவர் உலோகங்களில் தங்கத்தை பிரதிபலிக்கக் கூடியவர். நவகிரகங்களில் மங்களகாரகன் என போற்றப்படும் குருவுக்கு பொன்னன் என்ற பெயரும் உண்டு. இதன் காரணமாகவே அட்சய திருதியை நாளில் தங்கம் வாங்க வேண்டும். இந்த நாளில் தங்கம் வாங்கினால் மங்கலங்கள் அதிகரித்து, தங்கம் சேர்ந்து கொண்டே இருக்கும் என சொல்லப்படுகிறது.
வட மாநிலங்களில் அட்சய திருதியை நாளில் தான் விநாயகரையும், மகாட்சுமியையும் வணங்கி புது கணக்கினை துவங்குவார்கள். மகாலட்சுமியின் அருளை அனைவரும் பெற வேண்டும் என்பதே அட்சய திருதியை தினத்தின் நோக்கமாகும். இப்படி எண்ணற்ற சிறப்புக்களையும், பெருமைகளையும் கொண்ட தினம் அட்சய திருதியை என்பதால் தான் இந்த நாளை தவற விடாமல் பூஜை செய்து வழிபட வேண்டும் என்கிறார்கள். இந்த நாளில் முன்னோர்க்கு தர்ப்பணம் கொடுப்பதும் பல மடங்கு புண்ணிய பலனை தரும்.
Readmore: வெஸ்ட் நைல் காய்ச்சல் உஷார்!… நோய்களின் ஹாட் ஸ்பாட்டாக கேரளா ஏன் உள்ளது?
