பெங்களூருவில் தன்னை கல்யாணம் செய்ய மறுத்த காதலியை பதினாறு முறை கத்தியால் குத்தி கொடூரமாக கொலை செய்திருக்கிறார் காதலன். இச்சம்பவம் கர்நாடக மாநிலத்தில் அதிர்வலைகளை ஏற்படுத்தி இருக்கிறது. ஐடி நகரமான பெங்களூருவில் இயங்கி வரும் ஒமேகா ஹெல்த் கேர் நிறுவனத்தில் பணிபுரிந்து வந்தவர் லீலாவதி பவித்ரா நளமதி. இவர் தனது பணியை முடித்துவிட்டு இரவு ஏழரை மணியளவில் அலுவலகத்திலிருந்து கீழே இறங்கி வந்தபோது அங்கு நின்று கொண்டிருந்த அவரது காதலனுக்கும் இவருக்குமிடையே வாக்குவாதம் ஏற்பட்டு இருக்கிறது. அப்போது ஆத்திரமடைந்த இவரது காதலன் பவித்ராவை, தலை வயிறு, தோள்பட்டை, கை என உடலின் பல்வேறு பகுதிகளில் 16 முறை கத்தியால் சரமாரியாக குத்தி இருக்கிறார். இதில் பலத்த காயமடைந்த பவித்ரா சம்பவ இடத்திலேயே பரிதாபமாக உயிரிழந்தார்.
இது தொடர்பாக வழக்கு பதிவு செய்திருக்கும் காவல்துறையினர் அவரது காதலனான தினகர் என்பவரை கைது செய்து இருக்கிறது. இவர் லாஜிஸ் ஹெல்த் கேர் என்ற நிறுவனத்தில் பணியாற்றி வருகிறார். தினகரும் பவித்ராவும் ஐந்து ஆண்டுகளாக காதலித்து வந்ததாகவும் பவித்ராவின் வீட்டில் சாதியை காரணம் காட்டி தினகருக்கு திருமணம் செய்து வைக்க மறுத்துள்ளனர். பவித்ராவும் வேறொருவரை திருமணம் செய்து கொள்ள முடிவெடுத்ததால் ஆத்திரத்தில் கொலை செய்ததாக காவல்துறையில் வாக்குமூலம் அளித்திருக்கிறார். அவர் மீது கொலை வழக்கு பதிவு செய்துள்ள காவல்துறையினர் அவரை சிறையில் அடைத்திருக்கின்றனர். இச்சம்பவம் பெங்களூரு பகுதியில் அதிர்ச்சியை ஏற்படுத்தி இருக்கிறது.
