சட்டப்பேரவையில் தமிழக அரசின் 2024-25-ம் நிதி ஆண்டுக்கான பொது பட்ஜெட்டை நிதி அமைச்சர் தங்கம் தென்னரசு இன்று காலை 10 மணிக்கு தாக்கல் செய்கிறார்.
மக்களவை பொதுத் தேர்தல் அறிவிப்பு மார்ச் முதல் வாரம் வெளியாக உள்ள நிலையில், வரும் 2024-25-ம் நிதி ஆண்டுக்கான தமிழக அரசின் பட்ஜெட் பிப்ரவரி மாதமே தாக்கல் செய்யப்படுகிறது. நிதித் துறை பொறுப்பை ஏற்ற பிறகு, அமைச்சர் தங்கம் தென்னரசு முதல்முறையாக பட்ஜெட் தாக்கல் செய்கிறார். முன்னதாக, கடந்த 12-ம் தேதி ஆளுநர் உரையுடன் சட்டப்பேரவையின் ஆண்டு முதல் கூட்டம் தொடங்கியது. அன்று நடந்த அலுவல் ஆய்வுக் குழு கூட்டத்தில் ஆளுநர் உரைக்கு நன்றி தெரிவிக்கும் தீர்மானத்தின் மீதான விவாதம் கடந்த 15-ம் தேதி வரை நடத்தி முடிக்கப்பட்டு, முதல்வர் ஸ்டாலின் பதிலுரையும் அளித்தார்.
இந்நிலையில், ‘மாபெரும் 7 தமிழ்கனவு’ என்ற தலைப்பில் சமூக நீதி,கடைக்கோடி மனிதருக்கும் நலவாழ்வு, உலகை வெல்லும் இளைய தமிழகம்,அறிவுசார் பொருளாதாரம், சமத்துவ நோக்கில் மகளிர் நலம், பசுமை வழிபயணம், தாய்த் தமிழும் தமிழர் பண்பாடும் ஆகிய 7 சிறப்பு அம்சங்கள் தமிழக பட்ஜெட்டில் இடம்பெறும் என்று தமிழக அரசு தெரிவித்துள்ளது.
