நடப்பாண்டின் ஆயுதபூஜை வரும் 23ஆம் தேதி கொண்டாடப்படுகிறது. அன்றைய தினம் திங்கட்கிழமையாக வருகிறது. அதேபோல, விஜயதசமி மறுநாள் செவ்வாய்க்கிழமை கொண்டாடப்படுகிறது. அந்தவகையில், ஆயுத பூஜை, விஜயதசமி பண்டிகை நாட்களுடன் சனி, ஞாயிறு என மொத்தமாக 4 நாட்கள் அரசு விடுமுறை வருகின்றன.
அதனால், சென்னையில் தங்கி வேலைபார்ப்பவர்கள், மாணவர்கள் என பலரும் சொந்த ஊர்களுக்கு செல்ல ஆர்வம் காட்டி வருகின்றனர். ஆனால், ரயில்களில் டிக்கெட் புக்கிங் முன்கூட்டியே ஆரம்பமாகிவிட்டது. அரசுப் பேருந்துகளிலும் கூட்டம் நெருக்கி தள்ளிவிடும். அதனால்தான், நேற்று முதல் 3 நாட்கள் சிறப்பு பஸ்கள் இயக்க அரசு முடிவு செய்திருக்கிறது. தொடர் விடுமுறையை முன்னிட்டு பள்ளிகளுக்கு இன்று முதல் விடுமுறை அளிக்கப்பட்டுள்ளது.
தமிழ்நாட்டில் உள்ள பள்ளிகளுக்கு சமீபத்தில்தான் காலாண்டு தேர்வுக்கான விடுமுறை 5 முதல் 11 நாட்கள் வரை விடப்பட்டிருந்தது. அதனால், துர்கா பூஜைக்கான பண்டிகைக்கு, பெரும்பாலும் 3 முதல் 4 நாட்கள் தான் விடுமுறை அளிக்கப்படும் என்ற எதிர்பார்ப்பு நிலவியபடியே இருந்தது. இந்நிலையில், 4 நாட்களுக்கு பள்ளிகள் விடுமுறை விடப்பட்டுள்ளது. பண்டிகைகள் முடிந்த நிலையில், மீண்டும் 25ஆம் தேதி பள்ளிகள் திறக்கப்பட உள்ளன. அதேநேரம், 10, 11, 12ஆம் வகுப்புகளுக்கு மட்டும் சனிக்கிழமை சிறப்பு வகுப்புகள் நடத்தப்பட உள்ளதாக அறிவிப்பு வெளியாகி உள்ளது.
