பொறியியல் மாணவர்களுக்கான பொதுப்பிரிவு கலந்தாய்வு நாளை நடைபெறும் என அறிவிக்கப்பட்டிருந்த நிலையில் திடீரென ஒத்திவைக்கப்படுவதாக அமைச்சர் பொன்முடி அறிவித்துள்ளார்.
தமிழ்நாடு முழுவதும் உள்ள 431 பொறியியல் கல்லூரிகளில் இருக்கும் பி.இ., பி.டெக்., பி.ஆர்க் படிப்புகளில் சேருவதற்கான சிறப்பு பிரிவு கலந்தாய்வு கடந்த சனிக்கிழமை தொடங்கியது. இந்த கலந்தாய்வில் கலந்து கொள்ள 1,58,157 பேர் தகுதியுள்ளவர்களாக அறிவிக்கப்பட்டனர். மொத்தம் 1,48,811 இடங்கள் இருக்கின்றன. முதலில் சிறப்பு பிரிவு மாணவர்களுக்கு சனிக்கிழமை முதல் இன்று (புதன்கிழமை) வரை கலந்தாய்வு நடைபெற உள்ளது. பொதுப்பிரிவு கலந்தாய்வு நாளை (வியாழக்கிழமை) முதல் தொடங்கி 4 சுற்றுகளாக நடைபெறுவதாக அறிவிக்கப்பட்டிருந்தது. சிறப்பு பிரிவில் அரசு பள்ளி மாணவர்களுக்கான 7.5 சதவீத ஒதுக்கீட்டுக்கும் கலந்தாய்வு நடைபெறுவதாக இருந்தது. ஆனால், அதை சிறப்பு பிரிவில் நடத்தாமல், பொதுப்பிரிவு கலந்தாய்வு நடத்தும் அதே தேதியில் நடத்த தொழில்நுட்ப கல்வி இயக்ககம் முடிவு செய்திருந்தது.
இந்நிலையில், நாளை நடைபெற இருந்த பொறியியல் மாணவர்களுக்கான பொதுப்பிரிவு கலந்தாய்வு ஒத்திவைக்கப்படுவதாக அறிவிக்கப்பட்டுள்ளது. நீட் தேர்வு முடிவுகள் தாமதமாவதால் கலந்தாய்வை தள்ளி வைப்பது குறித்து உயர்கல்வித்துறை இன்று ஆலோசனை நடத்தியது. நீட் தேர்வு முடிவுகளுக்கு முன்பாக பொறியியல் கலந்தாய்வை நடத்தினால், தேர்வு முடிவுகள் வெளியான பின் பல இடங்கள் காலியாகும் சூழல் ஏற்படும் என்று பரிசீலித்து வந்தனர். இந்நிலையில், விழுப்புரத்தில் செய்தியாளர்களை சந்தித்த உயர்கல்வித்துறை அமைச்சர் பொன்முடி, பொதுப்பிரிவு கலந்தாய்வு தள்ளிவைக்கப்படுவதாக அறிவித்துள்ளார். நீட் தேர்வு முடிவுகள் வெளிவந்த பிறகு இரண்டு நாட்கள் கழித்து பொறியியல் பொது கலந்தாய்வு நடைபெறும் என்றும் அவர் விளக்கம் அளித்துள்ளார்.
