டெல்லி அணிக்கு எதிரான போட்டியின் முதல் இன்னிங்ஸின் இறுதியில் தல தோனி அடித்த சிக்ஸர்களின் வீடியோவை சிஎஸ்கே அணி ட்விட்டரில் பகிர்ந்துள்ளது.
ஐபிஎல் தொடரின் 16 சீசன் விறுவிறுப்பாக நடைபெற்று வருகிறது. ஒவ்வொரு அணியும் பிளே ஆப் சுற்றுக்கு முன்னேற போட்டிப்போட்டுக் கொண்டு களத்தில் அனல் தெறிக்க விளையாடி வருகிறது. ஐபிஎல் தொடரில் லீக் சுற்றுகள் தற்போது விறுவிறுப்பான கட்டத்தை எட்டியுள்ளது. இந்தநிலையில், சென்னை சேப்பாக்கத்தில் நடைபெற்ற போட்டியில் 55வது லீக் போட்டியில் சென்னை சூப்பர் கிங்ஸ் மற்றும் டெல்லி கேப்பிடல்ஸ் அணிகள் மோதின. இந்த போட்டில் சென்னை அணி கேப்டன் தோனி டாஸ் வென்று முதலில் பேட்டிங்கை தேர்வு செய்தார். இதன்படி, முதலில் களமிறங்கிய சென்னை அணி நல்ல தொடக்கத்துடன் தனது இன்னிங்ஸை விளையாட ஆரம்பித்தது. பின்பு பொறுப்பாக விளையாடிக் கொண்டிருந்த சிவம் துபே(25 ரன்கள்), ருதுராஜ் கெய்க்வாட்(24 ரன்கள்) ஆட்டமிழக்க, கேப்டன் தோனி களமிறங்கினார்.
18 ஓவர்கள் முடிவில் 139 ரன்கள் அடித்திருந்த சென்னை அணிக்கு உற்சாகம் அளிக்கும் வகையில், களத்தில் இறங்கிய கேப்டன் தல தோனி கடைசி கட்டத்தில் அதிரடியாக மாஸ் காட்டி விளையாடினார். 18.3 ஓவரில் ஒரு சிக்ஸர் அடித்துபறக்கவிட்டார். பின்னர் அதே ஓவரில் அவர் அடித்த மற்றொரு சிக்ஸர் ரசிகர்களுக்கு விருந்தாக அமைந்தது. 9 பந்துகளில் 2 சிக்சர்களை பறக்க விட்டு 20 ரன்கள் எடுத்து அவுட்டானார்.
இதனையடுத்து 168 ரன்கள் இலக்குடன் களமிறங்கிய டெல்லி அணி, சென்னை அணியின் அசத்தலான பந்துவீச்சால் 140 ரன்கள் மட்டுமே எடுத்தது. இதனால் சென்னை அணி 27 ரன்கள் வித்தியாசத்தில் டெல்லி அணியை வென்றது. தற்பொழுது தோனி அடித்த அந்த சிக்ஸர்களின் விடியோவை சிஎஸ்கே ட்விட்டரில் பகிர்ந்துள்ளது.
