மொட்டை மாடியில் தூங்குவது தொடர்பான பிரச்சனையில் பெற்ற மகளை தந்தை கொடூரமாக கொலை செய்த சம்பவம் அதிர்ச்சியை ஏற்படுத்தியுள்ளது.
குஜராத் மாநிலம் சூரத்தில் வசித்து வருபவர் ராமானுஜ் சாஹூ. இவரின் மனைவி ரேகா. இந்த தம்பதிக்கு இரண்டு மகன்கள், 19 வயது மகள் இருந்துள்ளார். கோடை காலம் என்பதால் மொட்டை மாடியில் தூங்க சென்றிருக்கிறார் ராமானுஜ். அப்போது அவரின் மகளும் மொட்டை மாடியில் தூங்க சென்றுள்ளார். இதனால் மொட்டை மாடியில் படுத்து தூங்குவது தொடர்பாக இருவருக்கும் இடையே வாக்குவாதம் ஏற்பட்டுள்ளது. இந்த ஆத்திரத்தில் ராமானுஜ் தனது மகளைக் கடுமையாக திட்டியுள்ளார்.
அப்போது மகன்கள் இருவரும் தலையிட்டு சமாதானப்படுத்த முயன்றிருக்கிறார்கள். ஆனாலும் ஆத்திரம் தீராத ராமானுஜ், வீட்டில் இருந்த கத்தியை எடுத்து வந்து மகளை சரமாரியாக வெட்டத் தொடங்கியிருக்கிறார். இதை பார்த்ததும் அலறி அடித்துக் கொண்டு மகன்கள் ஓடி இருக்கிறார்கள். தந்தையின் கொலை வெறியை பார்த்து அவரின் அருகே நெருங்கவில்லை என்று கூறப்படுகிறது. ஆனால், இதை பார்த்ததும் மனைவி பதறி அடித்துக் கொண்டு கணவரை தடுத்திருக்கிறார். அவரையும் சரமாரியாக குத்தி இருக்கிறார். அது மட்டுமல்லாது மனைவியின் விரல்களை வெட்டி வீசி இருக்கிறார். ரத்த வெள்ளத்தில் விழுந்து துடி துடித்து மகள் சாகும் வரைக்கும் ஆவேசமாக வெட்டி இருக்கிறார் ராமானுஜ்.
இந்த கொடூர கொலை சம்பந்தமான காட்சிகள் அங்கிருந்த சிசிடிவி கேமராவில் பதிவாகி இருக்கின்றன. இந்த வழக்கில் கொலையாளி ராமானுஜ்ஜை போலீசார் கைது செய்து சிறையில் அடைத்துள்ளனர். படுகாயம் அடைந்த மனைவி ரேகா மருத்துவமனையில் தீவிர சிகிச்சை பிரிவில் அனுமதிக்கப்பட்டுள்ளார்.
