தான் அதிமுகவில் இணைய போவதாக வெளியான செய்திக்கு திமுக முன்னாள் துணை பொதுச்செயலாளர் சுப்புலட்சுமி ஜெகதீசன் மறுப்பு தெரிவித்துள்ளார்.
முன்னாள் மத்திய அமைச்சரும், திமுக துணைப் பொதுச் செயலாளருமான சுப்புலட்சுமி ஜெகதீசனுக்கு, கட்சியில் முக்கியத்துவம் அளிக்கப்படவில்லை என்று கூறப்படுகிறது. இதனால் அவர் கட்சிப் பதவியை ராஜினாமா செய்ததாக கடந்த வாரம் செய்திகள் வந்த நிலையில், திமுகவின் மூத்த தலைவர் ஒருவர், கட்சித் தலைமையகத்திற்கு அவரிடமிருந்து எந்தக் கடிதமும் வரவில்லை என்றார். ஒரு பக்கம் அவரது கணவர் ஜெகதீசன், கட்சியை விமர்சித்து, தொடர்ந்து சமூக வலைதளங்களில் பகிர்ந்து வருகிறார்.
கடந்த ஆண்டு மொடக்குறிச்சி சட்டமன்றத் தொகுதியில் பா.ஜ.க.வின் சி.சரஸ்வதியிடம் தோல்வியடைந்த எம்.எஸ்.சுப்புலட்சுமி, தனது வெற்றி வாய்ப்பை கெடுக்கும் வகையில் சில மாவட்ட நிர்வாகிகள் திட்டம் தீட்டியதாக தலைமையிடம் புகார் அளித்ததாக ஈரோடு திமுக வட்டாரங்கள் தெரிவித்தன. புகார் அளித்தும் எந்த நடவடிக்கையும் எடுக்காததால் வருத்தம் அடைந்தார். ராஜ்யசபாவுக்கு பரிந்துரைக்கப்படுவார் என்ற அவரது எதிர்பார்ப்பும் பொய்த்துப் போனது. இப்படி அரசியல் வட்டாரத்தில் அரசல் புரசலாக பேசி வருகின்றனர்.
ஆனால் தான் கட்சியில் நீண்ட காலமாக பணியாற்றியதால் அரசியலில் இருந்து ஓய்வு எடுக்க நினைத்தேன். அதனால், தான் தனது ராஜினாமாவை அறிவித்துள்ளதாக சுப்புலட்சுமி ஜெகதீசன் விளக்க கடிதம் ஒன்றை அளித்திருந்தார். இதை அடுத்து அவர் அதிமுகவில் இணைய உள்ளதாக சமூக வலைதளங்களில் மீண்டும் ஒரு செய்தி வெளியான. அதற்கு விளக்கம் அளித்த அவர், தான் எந்த ஒரு கட்சியிலும் இணைய போவதில்லை என கூறியுள்ளார்.
