கூகுள் நிறுவனம் செலவை குறைக்கும் திட்டத்தின் ஒரு பகுதியாக எடுத்துள்ள முடிவால் ஊழியர்கள் கலக்கத்தில் உள்ளனர். உக்ரைன் போர், கொரோனா தொற்று ஆகிய காரணங்களால் பல்வேறு நிறுவனங்கள் தங்களின் பணியாளர்களின் எண்ணிக்கையை குறைத்தனர். இந்த பட்டியலில் கூகுள் நிறுவனம் இடம்பெற்றது. அதன்படி, கடந்த ஜனவரி 3ஆம் வாரத்தில் 12 ஆயிரம் பேரை வேலையில் இருந்து நீக்கும் முடிவை கூகுள் நிறுவனம் எடுத்தது.
இந்த அதிர்ச்சியில் இருந்து பணியாளர்கள் மீள்வதற்குள் கூகுள் நிறுவனம் அடுத்த அறிவிப்பை வெளியிட்டு கூடுதல் அதிர்ச்சியை ஏற்படுத்தியுள்ளது. செலவை குறைக்கும் திட்டத்தில் ஒரு பகுதியாக எடுக்கப்பட்டு வரும் நடவடிக்கை அடுத்து பணியாளர்களுக்கான பல்வேறு சேவைகளை கைவிடுவது என்று முடிவு செய்துள்ளது கூகுள் நிறுவனம். அதன்படி ஊழியர்களுக்கு பணியின் போது மசாஜ் வழங்குவது, உடலை கட்டுக்கோப்புடன் வைப்பதற்கான வகுப்புகள், பழுதடைந்த லேப் டாப்புகளுக்கு பதிலாக புதிதாக ஒன்றை மாற்றி தருவது, போக்குவரத்து சேவைகள் உள்ளிட்ட சேவைகளை கைவிட கூகுள் நிறுவனம் முடிவு செய்துள்ளது.
