NPS: மத்திய ஊழியர்கள் 20 ஆண்டுகளுக்கு பிறகு NPS-இன் கீழ் விருப்ப ஓய்வு பெறலாம் என்று புதிய வழிகாட்டுதல்களில் தெரிவிக்கப்பட்டுள்ளது.
தேசிய ஓய்வூதியத் திட்டம் (NPS) முதன்முதலில் ஜனவரி 2004 இல் அறிமுகப்படுத்தப்பட்டது. இது அரசு ஊழியர்களுக்கான ஓய்வூதியத் திட்டமாகும். NPS என்பது ஒரு நீண்ட கால தன்னார்வ ஓய்வூதியத் திட்டமாகும், இது பொது அல்லது தனியார் ஊழியர்களுக்காக ஓய்வூதிய நிதியை உருவாக்க கொண்டுவரப்பட்டது. இது அரசாங்கம் மற்றும் ஓய்வூதிய நிதி ஒழுங்குமுறை மற்றும் மேம்பாட்டு ஆணையத்தால் (PFRDA) நடத்தப்படுகிறது. இந்தநிலையில், NPS திட்டத்தில் புதிய வழிகாட்டுதல்கள் வெளியிடப்பட்டுள்ளது, அதில், மத்திய ஊழியர்கள் NPS இன் கீழ் விருப்ப ஓய்வு பெறலாம் என்று குறிப்பிட்டுள்ளது.
மத்திய சிவில் சர்வீசஸ் 2021ன் விதிகளின் கீழ் NPS இல் சேரும் அனைத்து ஊழியர்களுக்கும் இந்த வசதி வழங்கப்படும் என ஓய்வூதியம் பெறுவோர் நலத்துறை (DoP&PW) தெரிவித்துள்ளது. அந்தவகையில், சேவை விதி 12ன் கீழ் விருப்ப ஓய்வு பெற விரும்பும் பணியாளர்கள் ஒரு குறிப்பிட்ட காலத்திற்குப் பிறகு ஓய்வு பெற அனுமதிக்கப்படுவார்கள் மேலும் அவர்கள் NPS விதிகளின் கீழ் ஓய்வூதியம் பெற தகுதியுடையவர்கள்.
இந்த விதியின் கீழ், என்பிஎஸ்-ன் கீழ் வரும் மத்திய ஊழியர்கள் 20 ஆண்டுகள் பணி முடித்த பிறகு எப்போது வேண்டுமானாலும் விருப்ப ஓய்வு பெறலாம் என்ற விதிமுறை உருவாக்கப்பட்டுள்ளது. அதாவது எந்த நேரத்திலும் பணியில் சேரும் பணியாளர்கள் 20 ஆண்டுகள் தொடர்ச்சியான பணியை முடித்தவுடன் விருப்ப ஓய்வு பெறும் வசதியைப் பெறுவார்கள்.
தன்னார்வ ஓய்வு பெற விரும்பும் எந்தவொரு ஊழியரும் குறைந்தபட்சம் மூன்று மாதங்களுக்கு முன்னதாகவே இது குறித்து எழுத்துப்பூர்வமாக தெரிவிக்க வேண்டும் என்று வழிகாட்டுதல்கள் குறிப்பிடுகின்றன. தன்னார்வ ஓய்வு பெறும் ஊழியர்களின் விண்ணப்பத்தை முதலாளி நிராகரிக்க முடியாது. முதலாளிக்கு வழங்கப்பட்ட மூன்று மாத அறிவிப்பு காலம் முடிவடையும் நாளில் இருந்து இது நடைமுறைக்கு வரும்.
இதற்கிடையில், ஓய்வூதிய நிதி ஒழுங்குமுறை மற்றும் மேம்பாட்டு ஆணையத்தால் (PFRDA) நிர்ணயிக்கப்பட்ட விருப்ப ஓய்வு பெறும் ஊழியர்களுக்கு அரசாங்கம் அனைத்து வசதிகளையும் வழங்கும். இந்த வசதிகள் அனைத்தும் வழக்கமான ஓய்வுக்குப் பிறகு ஊழியர்களுக்கு வழங்கப்படுவது போலவே இருக்கும். ஊழியர் வேறு ஏதேனும் என்பிஎஸ் கணக்கைத் திறந்திருந்தால், இது குறித்து பிஎஃப்ஆர்டிஏ-வுக்குத் தெரிவிக்க வேண்டும் என்பதை கவனத்தில் கொள்ள வேண்டும்.
