நெல்லை மாவட்டம் நாங்குநேரி தொகுதியின் முன்னாள் எம்.எல்.ஏ. மாணிக்கராஜ். இவர், கடந்த 2001ஆம் ஆண்டு ஜெயலலிதா வழங்கிய வாய்ப்பால் நாங்குநேரி தொகுதியில் இருந்து சட்டப்பேரவை உறுப்பினராக தேர்வு செய்யப்பட்டார். அதிமுகவில் பல முக்கிய பொறுப்புகளில் பணியாற்றியுள்ள மாணிக்கராஜ், தென் மண்டலத்தில் முக்கிய நிர்வாகியாகவும் இருந்து வந்தார். தற்போது அவருக்கு 71 வயது ஆகிறது. வயது மூப்பு காரணமாக ஏற்பட்ட உடல்குறைவால் அவதிப்பட்டு வந்தார்.
அதிமுக-வில் கடந்த சில ஆண்டுகளாக ஏற்பட்டுள்ள குழப்பங்களைத் தொடர்ந்து, அவர் அரசியலில் இருந்தும் ஒதுங்கியிருந்தார். இந்நிலையில், வீட்டில் அவர் இருக்கும்போது அவரது உயிர் பிரிந்துள்ளது. இந்த தகவலை அவரது குடும்பத்தினர் உறுதி செய்துள்ள நிலையில், அதிமுக தொண்டர்கள் மற்றும் தலைமை நிர்வாகிகள் தங்களின் இரங்கலை தெரிவித்து வருகின்றனர்.
