உடலில் கழிவு நீக்கம் என்பது இயற்கையான ஒரு செயல்முறையாகும். ஆனால் சிலர் நீண்ட தூர பயணத்தின் போதோ அல்லது உங்களுக்குப் பிடித்த தொடரின் இறுதி எபிசோடை மும்முரமாக பார்த்துக் கொண்டிருக்கும்போதோ, அலுவலக மீட்டிங்கின்போதோ சிறுநீர் கழிப்பதை கொஞ்ச நேரம் அடக்கி வைப்பார்கள். அதிக நேரம் சிறுநீரை அடக்கி வைப்பது விளைவுகளை ஏற்படுத்தலாம்.
நீங்கள் கழிவறைக்குச் செல்ல விரும்பினால், மூளை சிறுநீர்ப்பையின் தசைகள் சுருங்கும்படியும், ஸ்பைன்க்டர் தசைகள் தளர்வாகும்படியும் சமிக்ஞை செய்து, சிறுநீர்க்குழாய் வழியாக சிறுநீர் வெளியேறுகிறது. இருப்பினும், சிறுநீர் கழிக்க வேண்டாம் என்று நீங்கள் முடிவு செய்தால், மூளை ஸ்பிங்க்டர் தசைகளை இறுக்குவதற்கு சமிக்ஞை செய்கிறது. இதனால் சிறுநீர் அப்படியே வெளியேறாமல் இருக்கும்.
சிறுநீர்ப்பையில் சிறுநீர் நீண்ட நேரம் தங்கினால், பாக்டீரியாக்கள் வளரக்கூடும். இதனால் சிறுநீரக தொற்று ஏற்படும் அபாயம் உள்ளது. சிறுநீர் கழிக்கும் போது எரிச்சல் உணர்வு, சிறுநீரின் நிறம் மாறுதல், சிறுநீரில் கடுமையான துர்நாற்றம் மற்றும் அடிவயிற்றின் கீழ் வலி ஆகியவை சிறுநீரக தொற்றுக்கான முக்கிய அறிகுறிகளாகும்.
சிறுநீரக கற்கள்: சிறுநீரை நீண்ட நேரம் அடக்கி வைப்பதால், சிறுநீரகங்களில் உப்பு மற்றும் தாதுக்கள் குவிந்து கற்கள் உருவாகும். சிறுநீரகக் கற்கள் பெரிதாக வளர்ந்தால், அவை கடுமையான வயிற்று வலி, வாந்தி, சிறுநீரில் இரத்தம் போன்ற பிரச்சனைகளை ஏற்படுத்தும்.
சிறுநீர்ப்பை விரிவாக்கம்: சிறுநீர்ப்பையில் சிறுநீர் நீண்ட நேரம் சேமிக்கப்பட்டால், அதன் சுவர் நீண்டுவிடும். இது அதன் இயற்கையான சுருக்கத்தைக் குறைக்கிறது. இது சில நேரங்களில் சிறுநீர் முழுவதுமாக வெளியேற்றப்படுவதைத் தடுக்கிறது. சிறுநீர் முழுவதுமாக வெளியேறிவிட்டதாக உணராமல் இருப்பது, மீண்டும் மீண்டும் சிறுநீர் கழிக்க வேண்டும் என்ற உணர்வு, இரவில் மீண்டும் மீண்டும் கழிப்பறைக்குச் செல்ல வேண்டிய அவசியம் ஆகியவை இதன் அறிகுறிகளாகும்.
சிறுநீரக செயல்பாடு குறைபாடு: சிறுநீரை அதிக நேரம் அடக்கி வைப்பது சிறுநீரகங்களுக்கு அதிக அழுத்தத்தை ஏற்படுத்துகிறது. இது நீரிழிவு, உயர் இரத்த அழுத்தம் மற்றும் பிற பிரச்சனைகளை ஏற்படுத்தும். இந்நிலை தொடர்ந்தால், சிறுநீரக செயலிழப்பு ஏற்படும் அபாயம் உள்ளது.
சிறுநீர்ப்பை சுருக்கம்: நீண்ட நேரம் சிறுநீரை அடக்கி வைப்பது ஒரு பழக்கமாகிவிட்டால், அது சிறுநீர்ப்பை சுருங்குவதற்கு வழிவகுக்கும். இது சிறுநீரை முழுமையாக வெளியேற்ற முடியாத நிலைக்கு வழிவகுக்கிறது. இது இதய நோய், ஆபத்தான சிறுநீரக தொற்றுகள் மற்றும் சிறுநீரக செயலிழப்பு போன்ற பிரச்சனைகளை ஏற்படுத்தும். பொதுவாக, ஒரு நபர் 3 முதல் 6 மணி நேரம் வரை சிறுநீரை அடக்கி வைக்க முடியும். ஆனால் நீங்கள் இதை ஒரு பழக்கமாக மாற்றினால், மிகவும் கடுமையான விளைவுகள் ஏற்படும்.
