முதுகலை ஆசிரியர் பணிக்கு இன்று நேரடி கலந்தாய்வு நடைபெற உள்ளதாக தெரிவிக்கப்பட்டுள்ளது.
இது குறித்து பள்ளிக்கல்வித்துறை ஆணையர் நந்தகுமார் வெளியிட்டுள்ள செய்திக்குறிப்பில் கூறியதாவது; 2020-21 முதல் 2022-23ஆம் ஆண்டு முடிய உள்ள அரசு, நகராட்சி மேல்நிலைப் பள்ளிகளில் காலியாக உள்ள 2,849 முதுகலை ஆசிரியர், உடற்கல்வி இயக்குநர் நிலை 1, கம்ப்யூட்டர் பயிற்றுநர் நிலை 1 காலிப் பணியிடங்களை நிரப்பிட ஆசிரியர் தேர்வு வாரியம் மூலம் பணி நாடுநர்கள் தேர்வு செய்யப்பட்டனர்.
அவர்களில் அரசியல் அறிவியில், வரலாறு, புவியியல், மனையியல், கம்ப்யூட்டர் பயிற்றுநர் நிலை 1, உடற்கல்வி இயக்குநர் நிலை 1 ஆகியோருக்கு எழும்பூர் மகளிர் மேல்நிலைப் பள்ளியிலும், தாவரவியல், விலங்கியல் முதுகலை ஆசிரியர்களுக்கு நேரடி நியமனக் கலந்தாய்வு பள்ளிக்கல்வித்துறை இயக்குனர் அலுவலக வளாகத்திலும் நடைபெறுகிறது.
ஆசிரியர் தேர்வு வாரியத்தின் http://trb.tn.nic.in இணையதளத்தில் வெளியிடப்பட்டுள்ள பட்டியிலில் உள்ளவர்கள் ஆசிரியர் தேர்வு வாரியம் சான்றிதழ் சரிபார்ப்புக்கு அழைக்கப்பட்ட கடிதம் மற்றும் அனைத்துக் கல்வி சான்றிதழ் நகலுடன் இன்று காலை 9 மணிக்கு வர வேண்டும் என தெரிவித்துள்ளார்
