மனைவியின் நடத்தையில் சந்தேகப்பட்ட கணவர், அவரை கொலை செய்து உடலை காட்டுப் பகுதியில் வீசிய சம்பவம் பெரும் பெரும் பரபரப்பை ஏற்படுத்தியுள்ளது.
டெல்லி மாநிலம் ஃபதேபூர் பெரி பகுதியில் ஒரு பெண்ணின் சடலம் கிடப்பதாக காவல்துறையினருக்கு தகவல் வந்துள்ளது. இதையடுத்து, அங்கு விரைந்த போலீசார், அந்த பெண்ணின் சடலத்தை மீட்டு பிரேத பரிசோதனைக்காக மருத்துவமனைக்கு அனுப்பி வைத்தனர். பின்னர், இச்சம்பவம் குறித்து வழக்குப்பதிவு செய்து, அந்த பெண் யார் என்பது குறித்து விசாரணை மேற்கொண்டனர்.
இதற்கிடையே, அந்த பெண்ணின் உடல் கிடந்த பகுதியில் பொருத்தப்பட்டிருந்த சிசிடிவி காட்சிகளை ஆய்வு செய்த போது, கடந்த சனிக்கிழமை அதிகாலை ஆட்டோ ஒன்று சென்று திரும்பியது தெரியவந்தது. இதையடுத்து, அந்த ஆட்டோ எண்ணை வைத்து அதன் ஓட்டுநர் அருணை போலீசார் கைது செய்தனர். அவரிடம் நடத்தப்பட்ட விசாரணையில், பல அதிர்ச்சி தகவல்கள் வெளியானது. கொலை செய்யப்பட்ட பெண் தரம்வீரர் என்பவரது மனைவி ஸ்வீட்டி என்பது தெரியவந்தது.
ஆதரவற்ற பெண்ணான ஸ்வீட்டியை 70,000 ரூபாய் பணம் கொடுத்து தரம்வீர் திருமணம் செய்து மனைவியாக்கியுள்ளார். ஆனால், அடிக்கடி சொல்லாமல் கொள்ளாமல் வீட்டை விட்டு வெளியேறி ஸ்வீட்டி வெளியில் தங்கி வந்துள்ளார். இதனால் அவரது நடத்தையில் சந்தேகப்பட்ட கணவர் தரம்வீர் அவரை கொலை செய்ய திட்டமிட்டு அதன்படி, ஹரியானா எல்லையில் கழுத்தை நெரித்து கொலை செய்து காட்டுப்பகுதியில் வீசியுள்ளார். இந்த கொலை சம்பவம் தொடர்பாக தரம்வீர், சத்யவான், அருண் ஆகிய 3 பேர் கைது செய்யப்பட்டுள்ளனர்.
