தமிழ் சினிமாவில் லைட்மேன்களுக்கு உதவும் வகையில், மார்ச் 19ஆம் தேதி சென்னை இசை நிகழ்ச்சி ஒன்றை இசையமைப்பாளர் ஏ.ஆர். ரகுமான் ஏற்பாடு செய்துள்ளார். இதனை பார்க்க ஏராளமான மக்கள் வருவார்கள் என எதிர்பார்க்கப்படுகிறது. எனவே, இரவு 11 மணியுடன் முடிவடையும் மெட்ரோ ரயில் சேவையை இரவு 12 மணி வரை நீட்டித்து மெட்ரோ நிர்வாகம் அறிவித்துள்ளது. இது தொடர்பாக மெட்ரோ ரயில் நிர்வாகம் வெளியிட்டுள்ள அறிக்கையில், ”சென்னை மெட்ரோ ரயில் நிறுவனத்தின் வெளிப்புற பங்குதாரர் மார்க் மெட்ரோ நிறுவனத்தின் சார்பில் நேரு உள்விளையாட்டு அரங்கில் ஏ.ஆர்.ரகுமான் இசை நிகழ்ச்சி மார்ச் 19ஆம் தேதி இரவு 7 மணி முதல் 11:30 மணி வரை நடைபெறுகிறது.
இந்நிகழ்ச்சி டாக்டர் எம். ஜி. ராமச்சந்திரன் சென்ட்ரல் மெட்ரோ ரயில் நிலையத்திற்கு அருகில் நேரு உள்விளையாட்டு அரங்கில் நடைபெறவுள்ளது. இந்நிகழ்ச்சியை கண்டுகளிக்க வரும் மெட்ரோ பயணிகள் மற்றும் பொதுமக்களின் வசதிக்காக அன்று இரவு 11.00 மணி வரை இயக்கப்பட்டு வரும் மெட்ரோ இரயில் சேவைகள், நள்ளிரவு 12.00 மணி வரை நீட்டிக்கப்படுகிறது. அன்றைய தினம் மெட்ரோ பயணிகள் மற்றும் பொதுமக்கள், மெட்ரோ ரயில் நிலையங்களில் உள்ள வாகன நிறுத்துமிடத்தைப் பயன்படுத்திக் கொள்ளுமாறும், பல்வேறு இடங்களில் இருந்து நிகழ்ச்சியை கண்டுகளிக்க வரும் மெட்ரோ பயணிகள், QR Code பயணச்சீட்டு மற்றும் பயண அட்டைகளை பயன்படுத்தி 20% கட்டண சலுகையை பெற்றுக்கொள்ளுங்கள்” என்று தெரிவித்துள்ளது.
