பெரம்பலூர் மாவட்ட ஆட்சியர் அலுவலகத்தில் திடீரென லிஃப்ட் பழுதானதால், அமைச்சர் சிவசங்கர் லிஃப்டுக்குள் மாட்டிக் கொண்டார்.
பெரம்பலூர் மாவட்டத்தில் பள்ளி அளவிலான கலைத் திருவிழா போட்டிகளில் வெற்றிப்பெற்ற மாணவர்களுக்கு பரிசு வழங்குதல் மற்றும் கூட்டுறவுத்துறையின் மூலம் மகளிருக்கு சுய உதவி குழுக்கள் மூலம் கடன் தள்ளுபடி செய்யும் நிகழ்ச்சியில் கலந்து கொள்வதற்காக பெரம்பலூர் ஆட்சியர் அலுவலகத்திற்கு போக்குவரத்துத்துறை அமைச்சர் சிவசங்கர் இன்று வருகை தந்தார். அப்போது, மேல் தளத்திற்கு செல்வதற்காக லிஃப்டில் சென்றிருக்கிறார். அந்த சமயத்தில், திடீரென்று லிஃப்ட் பழுதாகி இருக்கிறது. கிட்டத்தட்ட சுமார் 15 நிமிடங்கள் வரை லிஃப்டில் சிக்கியதாக தெரிகிறது.
இதனையடுத்து, தகவறிந்த ஆட்சியர் அலுவலக ஊழியர்கள் லிஃப்ட் பழுது பார்க்கும் நபர்களை வரவழைத்து சரிசெய்தனர். பின்னர் அமைச்சர் சிவசங்கர் பத்திரமாக வெளியே வந்தார். இந்த சம்பவத்தினால் பெரம்பலூர் மாவட்ட ஆட்சியர் அலுவலகத்தில் பெரிதும் பரபரப்பு ஏற்பட்டது.
