மாமல்லபுரம் அருகே இருசக்கர வாகனத்தில் சென்ற தந்தை மற்றும் மகன் ஆகிய இருவரும் அறுந்து தொங்கிய மின்சார கம்பியில் சிக்கி பரிதாபமாக உயிரிழந்துள்ள சம்பவம் அப்பகுதியில் சோகத்தை ஏற்படுத்தி இருக்கிறது. செங்கல்பட்டு மாவட்டம் மாமல்லபுரத்தை அடுத்த வடகடம்பாடி கிராமத்தைச் சார்ந்தவர் கோதண்டன் வயது 42. இவ்வாறு சம்பவம் நடந்த தினத்தன்று தனது மகன் ஹேமநாதனுடன் தண்ணீர் கேன் வாங்குவதற்காக அருகிலுள்ள மெயின் பஜாருக்கு தன்னுடைய இரு சக்கர வாகனத்தில் சென்று கொண்டிருந்தார். வயல்வெளி வழியாக சென்று கொண்டிருந்தபோது அங்கிருந்த உயர் மின்னழுத்த கம்பி ஒன்று அறுந்து விழுந்து இருக்கிறது.
இதனை அறியாமல் சென்ற கோதண்டத்தின் வாகனத்தில் உரசி மின்சாரம் பாய்ந்து அவரும் அவரது மகனும் தூக்கி வீசப்பட்டனர். இந்த சம்பவத்தில் அவர்கள் இருவரும் சம்பவ இடத்திலேயே மின்சாரம் பாய்ந்து பரிதாபமாக உயிரிழந்தனர். இச்சம்பவத்தை நேரில் கண்ட பகுதி மக்கள் உடனடியாக காவல்துறைக்கு மற்றும் மின்சாரத் துறைக்கு தகவல் கொடுத்தனர். இதனையடுத்து மின் இணைப்பை துண்டித்தனர். அதன் பிறகு மின்கம்பியில் சிக்கியிருந்த இருவரது உடலும் மீட்கப்பட்டு பிரேத பரிசோதனைக்காக அரசு மருத்துவமனைக்கு அனுப்பி வைக்கப்பட்டது. இது தொடர்பாக மாமல்லபுரம் போலீசார் வழக்கு பதிவு செய்து விசாரணை நடத்தி வருகின்றனர்.
