இந்திய அரசின் தலைமை வழக்கறிஞராக தமிழகத்தை சேர்ந்த மூத்த வழக்கறிஞர் ஆர்.வெங்கட்ரமணியை நியமனம் செய்து குடியரசு தலைவர் உத்தரவிட்டுள்ளார்.. வரும் அக்டோபர் 1 முதல், 3 ஆண்டுகளுக்கு இந்தியாவின் தலைமை வழக்கறிஞராக இருப்பார்.. தற்போதையை தலைமை வழக்கறிஞர் கே.கே.வேணுகோபாலின் பதவிக்காலம் செப்டம்பர் 30ஆம் தேதி முடிவடைகிறது. இந்த சூழலில் புதிய தலைமை வழக்கறிஞராக ஆர்.வெங்கட்ரமணி நியமிக்கப்பட்டுள்ளார்..
யார் இந்த ஆர். வெங்கட் ரமணி..? வெங்கட்ரமணி, உச்ச நீதிமன்றத்தில் 42 ஆண்டுகள் பணியாற்றிய அனுபவம் கொண்ட வழக்கறிஞர். 1997ல் உச்ச நீதிமன்றத்தால் மூத்த வழக்கறிஞராக நியமிக்கப்பட்டார். பின்னர் 2010ல் சட்ட ஆணையத்தின் உறுப்பினராகவும் நியமிக்கப்பட்டார்.
உச்ச நீதிமன்ற வழக்கறிஞராக : வெங்கட்ரமணி சட்டத்தின் பல்வேறு பிரிவுகளில் முக்கியமாக அரசியலமைப்பு சட்டம், மறைமுக வரிகள் சட்டம், மனித உரிமைகள் சட்டம், சிவில் மற்றும் குற்றவியல் சட்டம், நுகர்வோர் சட்டம் மற்றும் சேவைகள் தொடர்பான சட்டம் ஆகியவற்றில் பயிற்சி பெற்றுள்ளார். அவர் மத்திய அரசு, பல மாநில அரசுகள், பல்கலைக்கழகங்கள், பொதுத் துறை நிறுவனங்கள் ஆகியவற்றின் முக்கிய வழக்குகளில் உச்ச நீதிமன்றம் மற்றும் உயர் நீதிமன்றங்களில் ஆஜராகி, அதன் பணியாளர்கள் தொடர்பான விஷயங்களில் உச்ச நீதிமன்றத்தை தொடர்ந்து பிரதிநிதித்துவப்படுத்துகிறார்.
சர்வதேச பிரதிநிதித்துவங்கள் : 2001 ஆம் ஆண்டு ஜெனிவாவில் ஐக்கிய நாடுகளின் மனித உரிமைகளுக்கான உயர் ஆணையர் மற்றும் சர்வதேச நீதிபதிகள் ஆணையம் இணைந்து ஏற்பாடு செய்த பயிலரங்கில் வெங்கட்ரமணி பேச அழைக்கப்பட்டார். சர்வதேசத்திற்கான விருப்ப நெறிமுறை குறித்த அறிக்கையை மனித உரிமைகள் ஆணையத்திடம் சமர்ப்பிப்பதற்காக இந்த பயிலரங்கு ஏற்பாடு செய்யப்பட்டது..
