பட்டியலினத்தைச் சேர்ந்த 20 ஊராட்சி மன்ற தலைவர்களுக்குச் சுதந்திர தினத்தன்று தேசியக் கொடியை ஏற்ற அனுமதி மறுக்கப்பட்டதாக பாரதிய ஜனதா கட்சி தலைவர் அண்ணாமலை அறிக்கை வெளியிட்டுள்ளார். இதுபற்றி அவர் கூறியது பின்வருமாறு,
ஏற்றத்தாழ்வுகள் இல்லாத சமுதாயத்தை உருவாக்க வேண்டும் என்று தனது நடவடிக்கைகளின் மூலம் இந்நாட்டிற்கு எடுத்துக்காட்டாக நமது பாரத பிரதமர் நரேந்திர மோடி வாழ்ந்து வருகிறார். ஆனால் இங்கே, சமூக நீதியை நாங்கள் நிலைநாட்டி விட்டோம் என்று மேடைக்கு மேடை பேசுவதும், தமக்குத் தாமே சமூகநீதி காவலர் என்ற பட்டங்களை சூட்டிக் கொள்வதை வாடிக்கையாக வைத்துள்ளனர், திமுக தலைவர்கள்.
சமீபத்தில் பட்டியல் இனத்தை சேர்ந்த சின்னசேலம் வட்டம், எடுத்தவாய்நத்தம் ஊராட்சி தலைவர் சுதா வரதராஜி அவர்களை பட்டியலினத்தைச் சேர்ந்தவர் என்ற காரணத்தால், சுதந்திர தினத்தன்று நமது தேசியக் கொடியை ஏற்ற அனுமதி மறுக்கப்பட்டுள்ளதாக செய்திகள் வந்தது. இதை தொடர்ந்து, கள்ளக்குறிச்சி மாவட்ட தலைவருடன் நமது மாநில துணைத் தலைவர் எம்சி சம்பத்தை, ஊராட்சி தலைவர் சுதா வரதராஜி நேரில் சந்தித்து, இது தொடர்பாக மாவட்ட கலெக்டரிடம் புகார் மனு அளித்தனர். பிறகு நடத்தப்பட்ட பேச்சுவார்த்தையில் ஊராட்சி தலைவர் சுதா வரதராஜி சுதந்திர தினத்தன்று தேசியக் கொடியை ஏற்றலாம் என்ற முடிவு எடுக்கப்பட்டது.
இதை தொடர்ந்து தமிழக தீண்டாமை ஒழிப்பு இயக்கம் நடத்திய கணக்கெடுப்பில் திடுக்கிடும் பல உண்மைகள் வெளிவந்துள்ளன. 24 மாவட்டங்களில் ஊராட்சிகளில் நடத்தப்பட்ட கணக்கெடுப்பில், பட்டியலினத்தைச் சேர்ந்த 20 ஊராட்சி மன்ற தலைவர்களுக்கு சுதந்திர தினத்தன்று தேசியக் கொடியை ஏற்ற அனுமதி மறுக்கப்பட்டுள்ளது என்ற செய்தி அதிர்ச்சியை அளிக்கிறது. அதுமட்டுமில்லாமல் 22 ஊராட்சிகளில், பட்டியலினத்தைச் சேர்ந்த ஊராட்சி தலைவர்களுக்கு அமர இருக்கை தராமல் தரையில் அமர்த்தப்படுகிறார்கள்.
மேலும், 42 ஊராட்சிகளில், ஊராட்சி மன்ற தலைவர்களின் பெயர் பலகை வைப்பதற்கு அனுமதி மறுக்கப்பட்டுள்ளது. இங்கு அமர்ந்து கொண்டு உத்தரப் பிரதேசத்தில் என்ன நடக்கிறது பீகாரில் என்ன நடக்கிறது, என்று விவாதித்துக் கொண்டிருக்கும் சிலர், தமிழகத்தில் சம உரிமையோடு அனைத்து மக்களும் வாழ்ந்து வருகிறார்கள் என்ற மாயையில் உள்ளனர். மேலும் திமுக ஆட்சியில் சமூக நீதி என்பது பெயரளவில் மட்டுமே இருக்கிறது. என்பதைச் சமீப காலமாக நடக்கும் பல சம்பவங்கள் உறுதிப்படுத்தியுள்ளது என்று கூறியுள்ளார்.
