சென்னை அமைந்தகரை செனாய் நகர் பாரதிபுரம் பகுதியில் வசிப்பவர் சாகுல்அமீது (57). இவர் தள்ளுவண்டியில் காய்கறி வியாபாரம் செய்துவருகிறார். இவரது மகன் சதாம் உசேன். மனைவியையும், மருமகளையும் தினமும் சாகுல் அமீது அசிங்கமான வார்த்தைகளால் பேசி வந்துள்ளார். அவரை குடும்பத்தினர் கண்டித்தும் சாகுல்அமீது திருந்தவில்லை என தெரிகிறது. வழக்கம் போல் நேற்றும் மனைவியையும், மருமகளையும் ஆபாசமாக பேசியுள்ளார்.
இதனால் ஆத்திரம் அடைந்த சதாம்உசேன், தந்தையை தட்டிக்கேட்டுள்ளார். அப்போது இருவருக்கும் வாக்குவாதம் முற்றியதால் தந்தையை சரமாரியாக தாக்கியுள்ளார். பிறகு வீட்டில் இருந்த கத்தியை எடுத்து வந்து தந்தையின் கழுத்தை அறுத்துள்ளார். இதை பார்த்து அதிர்ச்சி அடைந்த தாய், அப்பாவை விட்டுவிடு என கதறி அழுதுள்ளார். ஆனால் எதையும் காதில் வாங்காத சதாம் உசேன் தந்தையின் கழுத்தை அறுத்துக் கொண்டிருந்ததால் சாகுல் அமீது மனைவி வெளியே ஓடிவந்து பக்கத்தில் உள்ளவர்களை உதவிக்கு அழைத்துள்ளார். இதை தொடர்ந்து ஆட்கள் வந்ததால் சதாம்உசேன் தப்பித்தார்.
அதன்பிறகு சாகுல்அமீதை கீழ்ப்பாக்கம் அரசு மருத்துவமனைக்கு அனுப்பி வைத்தனர். இந்நிலையில் அமைந்தகரை காவல்துறையினர் சென்று விசாரணை நடத்தி சதாம் உசேனை தேடி வந்தனர். இந்நிலையில், தந்தையின் கழுத்தை அறுத்த கத்தியுடன் அமைந்தகரை காவல் நிலையத்தில் சதாம் உசேன் சரணடைந்தார். அவரிடம் காவல்துறையினர் விசாரணை மேற்கொண்டனர்.
அப்போது சதாம் உசேன் கூறுகையில், என் தந்தை தள்ளுவண்டியில் காய்கறி வியாபாரம் செய்து வருகிறார். நான் கார் டிரைவராக உள்ளேன். என் தந்தை பத்தாயிரம் கடன் வாங்கி அந்த பணத்தில் குடித்துவிட்டு வந்து தாய் மற்றும் என் மனைவியை அசிங்கமாக பேசினார். நான் பலமுறை கண்டித்தும் அவர் திருந்தவில்லை. இதனால் ஏற்பட்ட ஆத்திரத்தில் தந்தையின் கழுத்தை அறுத்துவிட்டேன் என்றார். இதை தொடர்ந்து கொலை முயற்சி வழக்குபதிவு செய்து, சதாம் உசேனை கைது செய்து எழும்பூர் கோர்ட்டில் ஆஜர்படுத்தி புழல் சிறையில் அடைத்தனர்.
