பாலியல் வன்கொடுமைக்கு ஆளான ஒருவருக்கு தனது கர்ப்பத்தை மருத்துவ ரீதியாக கலைக்க சட்டப்பூர்வ உரிமை உண்டு என்று அலகாபாத் உயர் நீதிமன்றம் தீர்ப்பளித்துள்ளது. மேலும் அவளை தாய்மைக்கு கட்டாயப்படுத்துவது அவரது கண்ணியம் மற்றும் அடிப்படை உரிமைகளை மீறும் என்று வலியுறுத்தியுள்ளது.
பாலியல் வன்கொடுமையால் பாதிக்கப்பட்ட 17 வயது சிறுமியின் கர்ப்பத்தை கலைக்க அனுமதி கோரி உத்தர பிரதேச மாநிலம் அலகாபாத் நீதிமன்றத்தில் வழக்கு தொடரப்பட்டது. இந்த வழக்கு நீதிபதி மகேஷ் சந்திர திரிபாதி மற்றும் நீதிபதி பிரசாந்த் குமார் ஆகியோர் அடங்கிய அமர்வில் விசாரணைக்கு வந்தது.
அப்போது இளம்பெண் தரப்பில் ஆஜரான வழக்கறிஞர், பாதிக்கப்பட்ட சிறுமி தற்போது 19 வார கர்ப்பிணியாக உள்ளார் என்றும், மைனர் சிறுமியான அவர் குழந்தையை பெற்று வளர்க்கும் பக்குவத்தில் இல்லை என்றும் வாதிட்டார். பாலியல் வன்கொடுமையின் விளைவாக ஏற்பட்ட கர்ப்பமானது மனுதாரருக்கு மிகுந்த மனவேதனையை அளிப்பதாகவும் அவர் கூறினார்.
இதனை பதிவு செய்து கொண்ட நீதிபதிகள், பாலியல் வன்கொடுமைக்கு ஆளான ஒருவருக்கு தனது கர்ப்பத்தை மருத்துவ ரீதியாக கலைக்க சட்டப்பூர்வ உரிமை உண்டு. கருவை கலைக்கவிடாமல் செய்து, குழந்தை பெற்றுக்கொள்ள வைப்பது என்பது கண்ணியத்துடன் வாழ்வதற்கான அவளுடைய மனித உரிமையை மறுப்பதற்குச் சமமாகும்,
2003 ஆம் ஆண்டு (2021 இல் திருத்தப்பட்டது) மருத்துவ கர்ப்பக் கலைப்பு விதிகளின் விதி 3B ஐக் குறிப்பிட்டு, பாலியல் வன்கொடுமை, கற்பழிப்பு அல்லது பாலுறவில் இருந்து தப்பியவர்களுக்கும், சிறார்களுக்கும் 24 வாரங்கள் வரை கர்ப்பத்தை கலைக்க சட்டம் அனுமதிக்கிறது என்று நீதிமன்றம் குறிப்பிட்டது. இதே போன்ற வழக்குகளில் முந்தைய உச்ச நீதிமன்றம் மற்றும் டெல்லி உயர் நீதிமன்ற தீர்ப்புகளை மேற்கோள் காட்டி, “பாதிக்கப்பட்ட பெண்ணை பாலியல் வன்கொடுமை செய்த ஆணின் குழந்தையைப் பெற்றெடுக்க கட்டாயப்படுத்துவது விவரிக்க முடியாத துயரங்களுக்கு வழிவகுக்கும்” என்று பெஞ்ச் குறிப்பிட்டது.
