சோமாலிய கடற்கொள்ளையர்களிடம் இருந்து காப்பாற்றிய இந்திய கடற்படைக்கு பாகிஸ்தான் மற்றும் ஈரானிய குழுவினர் நன்றி தெரிவித்துள்ளனர்.
மத்திய கிழக்கு நாடுகளில் கடந்த சில காலமாகவே மோதல் போக்கு நிலவி வருகிறது. அந்தவகையில், சோமாலியாவின் கிழக்கு கடலில் சென்றுக்கொண்டிருந்த ஈரான் நாட்டை சேர்ந்த கப்பலை சோமாலிய கடற்கொள்ளையர்கள் சிறைபிடித்தனர். அந்த கப்பில் இருந்த 11 பேரையும் சிறைபிடித்து வைத்திருந்தனர். இதேபோன்று, கடந்த சனிக்கிழமையும் இம்மான் என்ற பெயருடன் சென்ற கப்பலையும் அதில் இருந்த பாகிஸ்தான் மற்றும் ஈரானை சேர்ந்த 17 பேரையும் கடற்கொள்ளையர்கள் சிறைபிடித்தனர்.
அங்கு ரோந்து பணியில் ஈடுபட்டிருந்தபோது இந்த தகவலை அறிந்த இந்திய கடற்படை சரியான நேரத்தில் அவர்களுக்கு உதவி செய்து கடற்கொள்ளையர்களிடமிருந்து சிறைபிடிக்கப்பட்டவர்கள் மீட்டனர். அதாவது கடந்த ஒருவாரத்தில் மட்டும் 3 முறை சோமாலிய கடற்கொள்ளையர்களால் கைப்பற்றப்பட்ட படகு மற்றும் சிறைபிடிக்கப்பட்டவர்களை இந்திய கடற்படை மீட்டது குறிப்பிடத்தக்கது.
இந்தநிலையில், சோமாலிய கடற்கொள்ளையர்களிடம் இருந்து காப்பாற்றிய இந்திய கடற்படைக்கு பாகிஸ்தான் மற்றும் ஈரானிய குழுவினர் நன்றி தெரிவித்துள்ளனர். இதுதொடர்பான வீடியோவை இந்திய கடற்படை வெளியிட்டுள்ளது. அதில் பேசிய ஈரானிய பணியாளர், நாங்கள் சோமாலிய கடற்கொள்ளையர்களால் பிடிக்கப்பட்டிருந்தோம், பின்னர், சோமாலிய கடற்கொள்ளையர்கள் இந்திய கடற்படையை கண்டு பயந்துவிட்டனர்” என்று கூறினார். மேலும், எங்கள் உயிரைக் காப்பாற்றிய இந்திய கடற்படைக்கு நன்றி” என்று கூறினர். இந்தியப் பெருங்கடல் பிராந்தியத்தில் கடல்சார் பாதுகாப்பில் இந்திய கடற்படை உறுதியாக இருப்பதாக இந்திய கடற்படை செய்தித் தொடர்பாளர் தெரிவித்தார்.
