முன்னாள் அமைச்சர் செல்லூர் ராஜுவை, புலி வாலை பிடித்த மதுரைக்காரர் என்று அமைச்சர் தங்கம் தென்னரசு கிண்டலாக பேசியதை முதல்வர் ஸ்டாலின் ரசித்து சிரித்தார்.
தமிழக சட்டபேரவையில் தற்போது பட்ஜெட் கூட்டத்தொடர் நடைபெற்று வருகிறது. துறை வாரியான மானிய கோரிக்கைகள் மீது விவாதம் நடைபெற்று வருகிறது.. அந்த வகையில் இன்று, உயர்கல்வித்துறை மற்றும் பள்ளிக் கல்வித்துறை தொடர்பான மானியக் கோரிக்கைகள் மீது விவாதம் நடைபெற்று வருகிறது. முன்னதாக கேள்வி நேரத்தில், முன்னாள் அமைச்சர் செல்லூர் ராஜூ பேசினார்.. அப்பொது, “மதுரையில் எந்தத் தொழிலும் இல்லை. இந்த நிலையில் மெட்ரோ ரயில் வந்து என்ன பயன். எல்லோரும் பாராட்டும் வகையில் தொழில்துறை அமைச்சர் ஒரு தொழிலைக் கொண்டுவர வேண்டும். மதுரை மக்கள் அவரை ஆஹா ஓஹோ என்று பாராட்ட வேண்டும்” என்று தெரிவித்தார்.
இதற்குப் பதில் அளித்த அமைச்சர் தங்கம் தென்னரசு, “தமிழக மக்கள் அனைவரும் அண்ணன் செல்லூர் ராஜூவை ஆஹா, ஓஹோ என்று கூறி வருகின்றனர். அதை கேட்டு. நானே அசந்து போய்விட்டேன். மதுரை மக்கள் மாட்டை தான் பிடிப்பார்கள். ஆனால் செல்லூர் ராஜூ புலியின் வாலை பிடித்து படம் வெளியிட்டுள்ளார். மதுரைக்காரர்கள் விவரமானவர்கள். எனவே அண்ணன் செல்லூர் ராஜூ, புலியின் வாய் இருக்கும் பக்கம் பிடிக்காமல், புலியின் வாலை பிடித்து படம் பிடித்திருந்தார்..” என்று கூறினார்…. இதனால் பேரவையில் சிரிப்பலை எழுந்தது.. முதலமைச்சர் ஸ்டாலினும் அமைச்சர் தங்கம் தென்னரசு பேசியதை கேட்டு ரசித்து சிரித்தார்..
தொடர்ந்து பேசிய அமைச்சர் “ மதுரையில் ரூ.600 கோடியில் டைடல் பார்க் அமைக்கப்படும். தொழில் முதலீடுகள் தென் மாவட்டங்களில் சமச்சீரான முறையில் கொண்டு வரப்படும்.. அதிகமான முதலீடுகள் தென் மாவட்டங்களை நோக்கி வரத்தொடங்கி உள்ளதால் மதுரையில் நிச்சயம் புதிய தொழில்பேட்டைகள் தொடங்கப்படும்..” என்று தெரிவித்தார்.
