”மின்சார சட்டத்திருத்த மசோதாவை திரும்பப் பெறும் வரை அழுத்தம் கொடுப்போம்” என்று அமைச்சர் செந்தில் பாலாஜி உறுதியளித்துள்ளார்.
கரூரில் செய்தியாளர்களை சந்தித்த மின்சாரத்துறை அமைச்சர் செந்தில் பாலாஜி, ”தமிழகத்தில் எந்த இடத்திலும் போதைப் பொருட்கள் இல்லாத அளவுக்கு முழுமையாக கட்டுப்படுத்த வேண்டும் என்றும் போதைப் பொருட்களை கட்டுப்படுத்தும் பணி இதுவரை இல்லாத அளவிற்கு மிகப் பெரிய மக்கள் இயக்கமாக உருவெடுத்துள்ளதாகவும் கூறினார். மேலும், மின் திருத்த சட்ட மசோதா நாடாளுமன்றத்தில் தாக்கல் செய்யப்பட்டவுடன் திமுக நாடாளுமன்ற குழு தலைவர் டி.ஆர்.பாலு, கடுமையாக எதிர்ப்பு தெரிவித்தார். மின்சார சட்டத்திருத்த மசோதா நடைமுறைக்கு வரும் பட்சத்தில் வீடுகளுக்கு வழங்கக்கூடிய 100 யூனிட் இலவச மின்சாரம், குடிசைகளுக்கான விவசாயிகள், நெசவாளர்களுக்கான இலவச மின்சாரம் எனு அனைத்தும் முற்றிலும் பாதிக்கப்படக் கூடிய சூழல் உருவாகும்.
மின்சாரத்தை அதிகமாக பயன்படுத்தக்கூடிய நுகர்வோர்கள், தொழிற்சாலைகள் பகுதிகளிலே அவர்களின் கவனம் இருக்கும். ஏழைகள் மீது கவனம் கொள்ளமாட்டார்கள். ஒட்டு மொத்தமாக அரசினுடைய கட்டமைப்பு, மின்வாரியத்தினுடைய கட்டமைப்பு நாம் உருவாக்குகின்ற கட்டமைப்பை தனியாருக்கு தாரை வார்க்கக்கூடிய அந்த சூழல்தான் இந்த மசோதாவில் இடம் பெற்றுள்ளன. மின்சார சட்டத்திருத்த மசோதாவை திரும்பப் பெறும் வரை அழுத்தம் கொடுப்போம்”. இவ்வாறு அவர் கூறினார்.
