உத்தரப் பிரதேசம், மீரட் நகரில் மூன்று மாதங்களாக நிலுவையில் உள்ள சம்பளத்தை கேட்ட இரண்டு ஊழியர்களை, கோழி வியாபாரி ஒருவர் கொடூரமாக தாக்கிய சம்பவம் அதிர்ச்சியை ஏற்படுத்தியுள்ளது. சம்பவத்தின் வீடியோ வெளிவந்துள்ள நிலையில், குற்றவாளியை உடனடியாக கைது செய்ய வேண்டும் என நெட்டிசன்கள் கோரிக்கை விடுத்துள்ளனர்.
வெளியான வீடியோவில், ஷான் குரேஷி என்ற நபர், தனது இரண்டு ஊழியர்களை பெல்ட்டால் அடிப்பது மட்டுமல்லாமல், அவர்களை ஒருவரையொருவர் அடிக்கவும் கட்டாயப்படுத்தியிருப்பது தெளிவாகக் காணப்படுகிறது. சம்பளக் கோரிக்கைக்கு பதிலாக உரிமையாளர் மேற்கொண்ட இந்த வன்முறை, மனிதநேயமற்ற செயலாகக் கூறப்படுகிறது.
தகவல்களின் படி, ஷான் குரேஷி அவர்கள் தனது ஊழியர்கள் கோழிகளைத் திருடியதாக குற்றம் சாட்டியுள்ளார். இதற்காக, அவர்களை சட்டவிரோதமாக பிணைக் கைதிகளாக வைத்திருந்ததும், தாக்குதல் நடத்தியதும் தெரியவந்தது. வீடியோ வெளியான நிலையில் நெட்டிசன்கள் கடுமையான கண்டனம் தெரிவித்து வருகின்றனர்.
பலர் உத்தரப் பிரதேச காவல்துறை மற்றும் மீரட் காவல்துறையின் அதிகாரப்பூர்வ சமூக ஊடகக் கணக்குகளை டேக் செய்து, குற்றவாளிக்கு எதிராக உடனடி மற்றும் கடுமையான நடவடிக்கை எடுக்க வேண்டும் என வலியுறுத்தி வருகின்றனர். இந்த சம்பவம் குறித்து காவல்துறையினர் இன்னும் அதிகாரப்பூர்வ அறிக்கை வெளியிடவில்லை.
ஆனால், சமூக ஊடகங்களில் பரவியுள்ள வீடியோ மற்றும் பொதுமக்களின் கோபம் காரணமாக, விரைவில் நடவடிக்கை எடுக்கப்படும் என எதிர்பார்க்கப்படுகிறது. இது, சமூகத்தில் பணியாளர்கள் மீது நடைபெறும் வன்முறைகளை வெளிச்சமிடும் இன்னொரு சம்பவமாகி, தொழிலாளர் உரிமைகள் மற்றும் பாதுகாப்பு குறித்து கேள்விகளை எழுப்பியுள்ளது.
Read more: அடுத்த 3 மணி நேரம்.. விடாமல் வெளுக்க போகும் மழை.. தமிழகத்தின் 6 மாவட்டங்களுக்கு பறந்த அலர்ட்..!
