சேரி மக்கள் குறித்து அவதூறாக பேசிய இரவின் நிழல் பட நடிகை பிரிகிடா சமூக வலைதளத்தில் மன்னிப்பு கோரியுள்ளார்.
தமிழ் சினிமாவின் முன்னணி இயக்குநர்களில் ஒருவர் நடிகர் பார்த்திபன். இவரின் ஒத்த செருப்பு படத்தின் வெற்றியை தொடர்ந்து இரவின் நிழல் படத்தை நடித்து இயக்கியுள்ளார். இப்படம் 96 நிமிடங்கள் ஒரே ஷாட்டில் படமாக்கப்பட்டு நான் லீனியர் திரைப்படம் என்ற பெருமையை பெற்றுள்ளது. படம் வெளியாவதற்கு முன்பே பல விருதுகளையும் பாராட்டுகளையும் பெற்றது. இப்படம் வெளியானது முதல் தற்போது வரை பார்த்திபன், நடிகை பிரிகிடா ஆகியோர் பல திரையரங்குகளுக்கு சென்று ரசிகர்களை நேரில் சந்தித்து நன்றி தெரிவித்து வருகின்றனர்.
இந்நிலையில், பிரிகிடா தியேட்டரின் வெளியில் பேட்டி கொடுக்கும் போது ‘சேரிக்கு போனால் அந்த மாதிரி (கெட்ட) வார்த்தைகளை தான் கேட்க முடியும். அதை மாற்றி நாம் சினிமாவுக்காக ஏமாற்ற எல்லாம் முடியாது. மக்களுக்கே தெரியும் அங்கே எப்படி பேசுவார்கள் என்று” என பிரிகிடா கூறினார். சேரி மக்கள் பற்றி நடிகை பிரிகிடா பேசியதற்கு சமூக வலைத்தளங்களில் ரசிகர்கள் தங்களது கண்டனத்தை பதிவு செய்து வருகின்றனர். இதற்கு தற்போது பிரிகிடா மன்னிப்பு கோரியுள்ளார். அதில் அவர் “இடத்தை பொறுத்து மொழி மாறும் என்பதை தான் கூற வந்தேன்..” என குறிப்பிட்டு மன்னிப்பு கேட்டிருக்கிறார். பார்த்திபனும் அவரது ட்வீட்டை பகிர்ந்து இந்த சம்பவத்திற்கு மன்னிப்பு கோரியுள்ளார்.
