முழங்கையைச் சுற்றியுள்ள சருமம் கருமையாக மாறுவது பலருக்கும் சாதாரணமான சருமப் பிரச்சனையாகவே தெரியும். தூசி, அழுக்கு, வெயில் அல்லது அடிக்கடி உராய்வதால் ஏற்பட்டிருக்கலாம் என நினைத்து ஸ்க்ரப் அல்லது கிரீம் பயன்படுத்தி கருமையை குறைக்க முயற்சி செய்வதும் வழக்கம். ஆனால், சில நேரங்களில் முழங்கையில் ஏற்படும் இந்த மாற்றம் உடலில் இருக்கும் சில பிரச்சனைகளுக்கான அறிகுறியாகவும் இருக்கலாம்.
முழங்கைப் பகுதியில் சருமம் தொடர்ந்து கருமையாகி, அதே நேரத்தில் தடிமனாகவும் மாறினால் அதற்கான காரணத்தை கவனிக்க வேண்டும். இதுபோன்ற சரும மாற்றத்தை மருத்துவத்தில் ‘அகாந்தோசிஸ் நிக்ரிகன்ஸ்’ (Acanthosis Nigricans) என அழைக்கின்றனர். இது தனிப்பட்ட நோய் அல்ல. உடலில் ஏற்படும் சில மாற்றங்களுடன் தொடர்புடைய சரும அறிகுறியாக இருக்கலாம்.
குறிப்பாக இன்சுலின் எதிர்ப்பு தன்மை இதற்கு ஒரு காரணமாக இருக்கலாம். உடலில் உள்ள செல்கள் இன்சுலினுக்கு சரியாக பதிலளிக்காத நிலையே இன்சுலின் ரெசிஸ்டன்ஸ். இது பின்னர் டைப்-2 நீரிழிவு நோய் ஏற்படும் அபாயத்தை அதிகரிக்கக்கூடும். சிலருக்கு ரத்தத்தில் சர்க்கரை அளவு அதிகரிப்பது கண்டறியப்படுவதற்கு முன்பே சருமத்தில் கருமையான திட்டுகள் தோன்றலாம்.
தைராய்டு சுரப்பியில் ஏற்படும் பிரச்சனைகளும் சருமத்தில் மாற்றங்களை ஏற்படுத்தலாம். குறிப்பாக ஹைப்போதைராய்டிசம் காரணமாக உடலின் வளர்சிதை மாற்ற செயல்பாடுகள் மந்தமாகும்போது, சருமம் வறண்டு, தடிமனாக அல்லது சீரற்ற தன்மையுடன் காணப்படலாம். சில பகுதிகளில் சருமத்தின் நிறத்திலும் மாற்றம் ஏற்பட வாய்ப்புள்ளது.
பெண்களைப் பொறுத்தவரை, பிசிஓஎஸ் எனப்படும் பாலிசிஸ்டிக் ஓவரி சிண்ட்ரோம் மற்றும் அதனுடன் தொடர்புடைய ஹார்மோன் சமநிலையின்மையும் கவனிக்க வேண்டிய காரணங்களில் ஒன்றாகும். பிசிஓஎஸ் நிலையில் இன்சுலின் அளவு அதிகரிப்பது உள்ளிட்ட ஹார்மோன் மாற்றங்கள் ஏற்படலாம். இதன் காரணமாக சருமத்தில் கருமையான, தடிமனான அல்லது வெல்வெட் போன்ற திட்டுகள் உருவாகலாம்.
அதனால் முழங்கையில் கருமை ஏற்பட்டவுடன் அது ஏதோ ஒரு தீவிர நோயின் அறிகுறி என பயப்பட வேண்டியதில்லை. அதே நேரத்தில், கருமை தொடர்ந்து அதிகரிப்பது, சருமம் தடிமனாவது அல்லது உடலில் வேறு மாற்றங்களுடன் சேர்ந்து இந்த அறிகுறி தோன்றுவது போன்ற நிலைகளில் வெறும் ஸ்க்ரப், கிரீம் பயன்படுத்தி மறைப்பதைவிட அதன் காரணத்தை கண்டறிவது முக்கியம். தேவையான நிலையில் மருத்துவரை அணுகி பரிசோதனை செய்துகொள்வது சரியான அணுகுமுறையாக இருக்கும்.
