திருச்சி ரயில்வே நிலையத்தில் வெடிகுண்டு வைத்திருப்பதாகவும், தான் மனித வெடிகுண்டாக மாறப்போவதாகவும் பேசிய நபரை போலீசார் அதிரடியாக கைது செய்தனர்.
திருச்சி மாநகர காவல்துறை நுண்ணறிவு பிரிவு அலுவலக வாட்ஸ் அப் எண்ணுக்கு கடந்த 23ஆம் தேதி ஒரு அழைப்பு வந்தது. அதில் பேசிய நபர் தான் மனித வெடிகுண்டு என்றும், திருச்சி ரயில்வே நிலையத்திற்கு வெடிகுண்டு வைத்து வெடிக்க வைக்கப்போவதாகவும் மேலும் தகாத வார்த்தைகளை கூறி வசைபாடியுள்ளார். இதனால் அதிர்ச்சியடைந்த காவல்துறையினர், உடனடியாக வெடிகுண்டு நிபுணர்கள் மற்றும் மோப்ப நாய் உதவியுடன் திருச்சி ரயில்வே சந்திப்பு முழுவதும் சோதனை மேற்கொண்டனர்.
ஆனால், எந்த விதமான வெடிகுண்டும் கைப்பற்றப்படவில்லை. இதையடுத்து, திருச்சி மாநகர காவல் ஆணையர் துரித விசாரணைக்கு தனிப்படை அமைத்து விசாரணை செய்ய அறிவுறுத்தினார். விசாரணையில், காவல்துறை அலுவலகத்தின் வாட்ஸ் அப் எண்ணுக்கு தொடர்பு கொண்டவர், புதுக்கோட்டை மாவட்டம் திருவள்ளூர நகரை சேர்ந்த செல்வராஜ் என்பது தெரியவந்தது. பின்னர் அவரை பிடித்து விசாரணை நடத்தியதில், அவரது பக்கத்து வீட்டில் வசிப்பவரை பழிவாங்கும் நோக்கத்தோடு இந்த செயலை செய்ததாக அவர் ஒப்புக்கொண்டார். இதையடுத்து, போலீசார் அவரை கைது செய்தனர்.
