நாள் முழுவதும் தண்ணீர் அதிகமாக குடிப்பவர்கள் அடிக்கடி சிறுநீர் கழிப்பது இயல்பான ஒன்றாகும். குறிப்பாக ஒருவர் தினமும் 3 லிட்டருக்கு மேல் தண்ணீர் குடித்தால், உடலில் சேரும் கூடுதல் திரவத்தை வெளியேற்ற உடல் முயற்சிப்பதால் சிறுநீர் உற்பத்தி அதிகரிக்கிறது. இந்த நிலையில் அடிக்கடி கழிப்பறைக்குச் செல்ல வேண்டியது உடலின் இயல்பான செயல்பாடாகவே கருதப்படுகிறது.
ஆனால், அதிக தண்ணீர் குடிக்காத நிலையிலும் அடிக்கடி சிறுநீர் கழிக்க வேண்டிய நிலை ஏற்பட்டால், அது உடலில் உள்ளக ஏற்றத்தாழ்வுகள் அல்லது நோய் அடையாளங்களாக இருக்கலாம் என்று மருத்துவர்கள் எச்சரிக்கின்றனர். இதுபோன்ற அறிகுறிகளை அலட்சியப்படுத்தக் கூடாது.
தேநீர் காபி காரணமா..? தினசரி வாழ்க்கையில் பலர் அதிக அளவில் தேநீர், காபி, குளிர்பானங்களை குடிக்கும் பழக்கம் பெற்றுள்ளனர். இதில் உள்ள காஃபின் என்ற மூலப்பொருள், டையூரிடிக் மருந்து போன்று செயல்படுகிறது. இதனால் சிறுநீர் உற்பத்தி இயல்பை விட அதிகரிக்கிறது. அதனால்தான், தொடர்ந்து தேநீர் அல்லது காபி குடிப்பவர்கள், அடிக்கடி கழிப்பறைக்குச் செல்ல வேண்டிய அவசியத்தை உணர்கிறார்கள். இந்த நிலையில் காஃபின் உட்கொள்ளலை கட்டுப்படுத்துவது நல்லது என்று மருத்துவர்கள் அறிவுறுத்துகின்றனர்.
மிகையான சிறுநீர்ப்பை: குறிப்பாக சிலருக்கு, சிறுநீர்ப்பை தசைகள் அளவுக்கு அதிகமாக உணர்திறன் மிக்கதாக மாறக்கூடும். இதன் காரணமாக, சிறிதளவு சிறுநீர் சேர்ந்தால்கூட உடனடியாக கழிப்பறைக்குச் செல்ல வேண்டும் என்ற உணர்வு ஏற்படும். இந்த நிலை மருத்துவ ரீதியாக “மிகையான சிறுநீர்ப்பை” (Overactive Bladder) என்று அழைக்கப்படுகிறது. இது நீண்ட காலம் தொடர்ந்தால், சிறுநீர் கட்டுப்பாடின்றி வெளியேறக்கூடிய அபாயம் உருவாகும். எனவே, தொடர்ந்து இதுபோன்ற நிலை ஏற்பட்டால், தாமதமின்றி மருத்துவ ஆலோசனை பெற வேண்டும் என்று நிபுணர்கள் கூறுகின்றனர்.
நீரிழிவின் முக்கிய அறிகுறியா? அடிக்கடி சிறுநீர் கழிப்பது, நீரிழிவு நோயின் முக்கிய ஆரம்ப அறிகுறிகளில் ஒன்றாகவும் கருதப்படுகிறது. இரத்தத்தில் சர்க்கரை அளவு அதிகரிக்கும் போது, உடல் அதிகமான குளுக்கோஸை சிறுநீர் வழியாக வெளியேற்ற முயற்சிக்கிறது. இதனால் சிறுநீர் அளவும், கழிக்கும் எண்ணிக்கையும் அதிகரிக்கிறது. இதனுடன் அதிக தாகம், இடைவிடாத சோர்வு, காரணமில்லாத திடீர் எடை இழப்பு போன்ற அறிகுறிகளும் இருந்தால், உடனடியாக இரத்தச் சர்க்கரை பரிசோதனை செய்து கொள்ள வேண்டும் என்று மருத்துவர்கள் வலியுறுத்துகிறார்கள்.
பெண்களுக்கு அதிகமாக பாதிக்கும் UTI: சிறுநீர் பாதை தொற்று (UTI) என்பது குறிப்பாக பெண்களுக்கு அதிகம் ஏற்படும் ஒரு பொதுவான உடல்நலப் பிரச்சனையாகும். இது பெரும்பாலும் சிறுநீர்ப்பை தொற்றின் காரணமாக உருவாகிறது.
UTI-யின் முக்கிய அறிகுறிகள்:
- சிறுநீர் கழிக்கும் போது எரியும் உணர்வு
- சிறுநீரில் துர்நாற்றம்
- வலி அல்லது எரிச்சல்
- அடிக்கடி கழிப்பறைக்குச் செல்ல வேண்டிய உணர்வு
இந்த அறிகுறிகள் இருந்தால் உடனடியாக மருத்துவரை அணுக வேண்டியது அவசியம்.
சிறுநீரக கற்களும் காரணமாக இருக்கலாம்: சில சந்தர்ப்பங்களில், சிறுநீரக கற்களும் அடிக்கடி சிறுநீர் கழிப்பதற்குக் காரணமாக இருக்கலாம். இதன் அறிகுறிகளில்:
- அடர் நிற சிறுநீர்
- அடிவயிற்றின் கீழ் அல்லது பக்கவாட்டில் வலி
- சிறுநீர் கழித்த பிறகும் முழுமையான நிவாரணம் இல்லாதது
ஆகியவை அடங்கும். இவை தென்பட்டால் உடனடியாக பரிசோதனை செய்து கொள்ள வேண்டும். அடிக்கடி சிறுநீர் கழிப்பது எப்போதும் சாதாரணமல்ல. அது உடல் தரும் முன்எச்சரிக்கை சிக்னலாகவும் இருக்கலாம். அறிகுறிகள் நீடித்தால், தாமதம் செய்யாமல் மருத்துவ பரிசோதனை செய்து கொள்ளுவது மட்டுமே பாதுகாப்பான வழி ஆகும் என்று மருத்துவர்கள் அறிவுறுத்துகின்றனர்.
Read more: Breaking : வாரத்தின் முதல் நாளே ஷாக் கொடுத்த தங்கம் விலை.. இன்றும் அதிரடி உயர்வு.. எவ்வளவு தெரியுமா?
