மாத சம்பளம் பெறுபவர்கள் சமையல் எரிவாயு சிலிண்டர் (LPG) முன்பதிவு செய்யும்போது முழுத் தொகையையும் செலுத்திவிட்டு, பிறகு அரசு வழங்கும் மானியத் தொகையை தங்கள் வங்கிக் கணக்கில் பெற்று வருகின்றனர். ஒரு வருடத்திற்கு 12 சிலிண்டர்கள் மட்டுமே மானிய விலையில் பெற முடியும் என்பதால், மக்கள் சமையல் எரிவாயுவை சிக்கனமாக பயன்படுத்துகின்றனர். ஆனால், சில சமயங்களில் சிலிண்டர் மானியம் திடீரென வருவது நின்று போகும். பலருக்கு மானியம் வருகிறதா? இல்லையா? என்பதே தெரிவதில்லை.
மானிய தடைக்கான முக்கியக் காரணம் : உங்கள் கேஸ் இணைப்புடன் ஆதார் அட்டையை இணைக்காமல் இருப்பதுதான் இந்த குழப்பங்கள் ஏற்படுவதற்கு ஒரு முக்கியக் காரணம். சம்பந்தப்பட்ட மாநில அரசுகள் எப்போதும் ஆதார் எண்ணுடன் இணைக்கப்பட்ட வங்கிக் கணக்கில்தான் மானியத்தை வரவு வைக்கும். எனவே, உங்கள் ஆதார் இணைக்கப்பட்ட வங்கிக் கணக்கு தற்போது செயல்பாட்டில் இருக்கிறதா என்பதை முதலில் உறுதி செய்துகொள்ள வேண்டும். மேலும், சிலிண்டர் வாங்கும் குடும்பத்தின் ஆண்டு வருமானம் ரூ.10 லட்சத்துக்கு மேல் இருந்தால், அவர்களுக்கு மானியம் கிடைக்காது. ஆனால், இந்தக் குடும்பங்களும் தங்கள் கேஸ் இணைப்பை ஆதாரோடு இணைப்பது கட்டாயம்.
ஆன்லைனில் மானிய நிலையை சரிபார்க்கும் முறை :
நீங்கள் மானியம் பெறவில்லை என்றாலோ அல்லது ஒன்றுக்கும் மேற்பட்ட வங்கிக் கணக்குகள் இருந்து எந்தக் கணக்குக்கு மானியம் செல்கிறது என்று தெரியாமல் இருந்தாலோ, அதை ஆன்லைன் மூலம் எளிதாகச் சரிபார்க்கலாம்.
* முதலில், www.mylpg.in என்ற இணையதளத்திற்கு செல்லவும்.
* முகப்புப் பக்கத்தில் உள்ள இண்டேன், பாரத் கேஸ், ஹெச்.பி. கேஸ் ஆகிய 3 எல்.பி.ஜி நிறுவனங்களில், உங்களுக்குச் சேவை வழங்கும் நிறுவனத்தின் படத்தைக் கிளிக் செய்து தேர்ந்தெடுக்கவும்.
* புதிய பக்கம் திறந்தவுடன், மேல் உள்ள ‘பார் மெனு’ பகுதிக்குச் சென்று ‘Give your feedback online’ என்பதைத் தேர்ந்தெடுக்கவும்.
* அதில், கேஸ் சிலிண்டர் முன்பதிவு செய்ய நீங்கள் அளித்த மொபைல் எண், வாடிக்கையாளர் ஐடி (Customer ID), மாநிலத்தின் பெயர் மற்றும் விநியோகஸ்தர் பற்றிய தகவல்களைப் பிழையின்றிப் பூர்த்தி செய்யவும்.
* அடுத்து, ‘Feedback Type’ என்பதைக் கிளிக் செய்து, ‘Complaint’ விருப்பத்தைத் தேர்ந்தெடுத்து ‘Next’ கொடுக்கவும்.
இப்போது உங்கள் மானியம் தொடர்பான அனைத்து விவரங்களும் திரையில் தோன்றும். மானியத் தொகை வங்கிக் கணக்கில் வந்ததா இல்லையா என்பதை நீங்கள் அதில் தெரிந்து கொள்ளலாம். உங்களுக்கு மானியம் வரவில்லை என்றால், அங்கேயே நீங்கள் புகாரைப் பதிவு செய்யலாம். அல்லது அரசின் அதிகாரப்பூர்வமான pgportal.gov.in என்ற தளத்திலும் புகாரைப் பதிவு செய்யலாம்.
