தூய்மை மற்றும் பசுமையான சூழலின் முக்கியத்துவத்தை உணர்த்த ஒவ்வொரு மாதமும் 2வது மற்றும் 4வது வாரத்தின் கடைசி வேலை நாளில் பள்ளிகளில் ‘ஷ்ரம்தான் நேரத்தை’ (தாமாக முன்வந்து தூய்மை நடவடிக்கையை மேற்கொள்ளுதல்) ஏற்பாடு செய்யுமாறு டெல்லி அரசின் பள்ளிக்கல்வித்துறை உத்தரவிட்டுள்ளது. அனைத்து மாணவர்களும் ஊழியர்களும் அந்தந்த பள்ளிகள், அலுவலகங்கள் மற்றும் சுற்றியுள்ள பகுதிகளில் தூய்மை பிரச்சார நடவடிக்கைகளில் தீவிரமாக பங்கேற்குமாறு கேட்டுக் கொள்ளப்பட்டுள்ளனர்.
இந்த கூட்டு முயற்சி அனைத்து பங்கேற்பாளர்களிடையே ஒற்றுமை மற்றும் உரிமையின் உணர்வைக் கொண்டுவரும், அதே நேரத்தில் சுத்தமான மற்றும் பசுமையான வளாகத்தை ஏற்படுத்தும்” என்று பள்ளிக்கல்வித்துறை வெளியிட்டுள்ள அறிக்கையில் தெரிவிக்கப்பட்டுள்ளது..
தூய்மை நேரத்தில் செயல்பாடுகள்
- பள்ளிகளில் ஒவ்வொரு மாதமும் 2-வது மற்றும் 4வது வாரத்தின் கடைசி வேலை நாளில், கடைசி இரண்டு வகுப்புகளில் தூய்மை மற்றும் அதனுடன் தொடர்புடைய செயல்பாடுகளுக்காக ஒதுக்கப்படும்.
- அனைத்து மாணவர்களும் தங்கள் பெற்றோரின் மேற்பார்வையின் கீழ் தயாரிக்கப்பட்ட தாங்களாகவே சமைத்த உணவுப் பொருட்களைக் கொண்டு வர வேண்டும்.. மதிய உணவு இடைவேளையின் போது தங்கள் வகுப்பு தோழர்களுடன் பகிர்ந்து கொள்ள வேண்டும்
- வகுப்பறைகளை சுத்தம் செய்தல் கதைசொல்லல் மற்றும் அனுபவங்களைப் பகிர்தல் மற்றும் சுவரொட்டி தயாரித்தல் ஆகியவை இத்திட்டத்தின் செயல்பாடுகளில் அடங்கும்.
- பல்வேறு வகையான குப்பைகளைப் பிரித்தெடுப்பதற்கு சிறப்பு முக்கியத்துவம் கொடுக்கப்பட வேண்டும் மற்றும் பச்சை, நீலம், மஞ்சள் நிறங்களின் குறிப்பிட்ட குப்பைத் தொட்டிகளில் தனித்தனியாகக் குப்பைகளைக் கொட்ட வேண்டும்.
- கழிவுகளை ஆதாரமாகப் பிரிப்பதை உறுதி செய்வதற்காக வண்ணக் குப்பைத் தொட்டிகளைப் பயன்படுத்துவது குறித்து மாணவர்களுக்கு விழிப்புணர்வு ஏற்படுத்த வேண்டும்
- சிறப்புப் பள்ளிக் கூட்டத்தின் மூலம் “தொழிலாளர் கண்ணியம்” என்பதன் முக்கியத்துவத்தைப் பற்றி மாணவர்களுக்குக் கற்பிக்கப்படுவதை உறுதிசெய்ய வேண்டும்..
- பள்ளிகளில் உள்ள வகுப்பறைகள், விளையாட்டு மைதானங்களில் குப்பைகளை கொட்டாமல் இருக்க மாணவர்களை ஊக்குவிக்க வேண்டும்.
ஷ்ரம்தான் நேரம் தொடர்பான நடவடிக்கைகளை திறம்பட நடத்துவதற்காக பள்ளிகள் மற்றும் அலுவலகங்களில் கண்காணிப்பு குழுக்கள் அமைக்கப்படும் என்று அதிகாரிகள் தெரிவித்தனர். ஷ்ரம்தான் நேரம், நமது சமூகத்திற்கு உதவுவதற்கும், நம்மைச் சுற்றியுள்ள சூழலை சிறப்பாக மாற்றுவதற்கும் உதவுவதற்கும் பங்களிப்பதற்கும் ஒரு வழியாகும் என்று தெரிவிக்கப்பட்டுள்ளது.
