இந்தியா அதிகாரப்பூர்வமாக ஜப்பானை முந்தி, உலகின் நான்காவது பெரிய பொருளாதாரமாக உயர்ந்துள்ளது. 2025-ம் ஆண்டிற்கான அரசின் பொருளாதார சீர்திருத்த அறிக்கையின்படி, இந்தியாவின் மொத்த உள்நாட்டு உற்பத்தி (GDP) தற்போது 4.18 டிரில்லியன் அமெரிக்க டாலர் ஆக உள்ளது.
இந்திய பொருளாதாரம் இதே வேகத்தில் வளர்ந்தால், 2030க்குள் ஜெர்மனியையும் முந்தி உலகின் 3-வது பெரிய பொருளாதாரமாக மாறும் என அரசு தெரிவித்துள்ளது. அந்த நேரத்தில் இந்தியாவின் GDP 7.3 டிரில்லியன் டாலர் ஆக இருக்கும் என்று கணிக்கப்பட்டுள்ளது.
உள்நாட்டு வளர்ச்சியே முக்கிய காரணம்
அரசு வெளியிட்ட அறிக்கையில் “4.18 டிரில்லியன் டாலர் மதிப்புள்ள GDP உடன் இந்தியா ஜப்பானை முந்தி உலகின் 4-வது இடத்தைப் பிடித்துள்ளது. அடுத்த 2.5 முதல் 3 ஆண்டுகளில் ஜெர்மனியையும் முந்தி மூன்றாவது இடத்தைப் பெறும் நிலையில் உள்ளது” என்று குறிப்பிடப்பட்டுள்ளது.
அமெரிக்கா உலகின் மிகப்பெரிய பொருளாதாரமாகவும், சீனா இரண்டாவது இடத்திலும் இருக்கும் நிலையில், உலக வர்த்தக சவால்களுக்கு மத்தியிலும் இந்தியா வேகமாக முன்னேறி வருவது குறிப்பிடத்தக்கது. இந்த வளர்ச்சிக்கு முக்கிய காரணமாக உள்நாட்டு நுகர்வு மற்றும் தனியார் செலவுகள் பெரிதும் உதவியுள்ளதாக அரசு தெரிவித்துள்ளது.
வளர்ச்சி விகிதம் தொடர்ந்து உயர்வு
2025–26 நிதியாண்டின் இரண்டாவது காலாண்டில் இந்தியாவின் உண்மை GDP வளர்ச்சி 8.2% ஆக பதிவாகியுள்ளது. முதல் காலாண்டில் இது 7.8%, கடந்த நிதியாண்டின் நான்காவது காலாண்டில் 7.4% ஆக இருந்தது. இதன் மூலம் இந்தியா தொடர்ந்து உலகின் மிக வேகமாக வளரும் முக்கிய பொருளாதார நாடாக திகழ்கிறது.
உலக நிறுவனங்களின் நம்பிக்கை
பல சர்வதேச நிதி நிறுவனங்களும் இந்திய வளர்ச்சியை உறுதிப்படுத்தியுள்ளன.
உலக வங்கி – 2026-ல் 6.5% வளர்ச்சி
மூடீஸ் (Moody’s) – 2026-ல் 6.4%, 2027-ல் 6.5%
ஐ.எம்.எஃப் (IMF) – 2025-ல் 6.6%, 2026-ல் 6.2%
ஓ.இ.சி.டி– 2025-ல் 6.7%, 2026-ல் 6.2%
S&P – நடப்பு நிதியாண்டில் 6.5%, அடுத்த ஆண்டில் 6.7%
ஆசிய அபிவிருத்தி வங்கி (ADB) – 2025 வளர்ச்சி கணிப்பை 7.2% ஆக உயர்த்தியுள்ளது
அரசு வெளியிட்ட அறிக்கையில், “2047க்குள் உயர் நடுத்தர வருமான நாடாக மாறும் இலக்குடன், இந்தியா வலுவான பொருளாதார அடித்தளங்களையும், கட்டமைப்பு சீர்திருத்தங்களையும், சமூக முன்னேற்றங்களையும் தொடர்ந்து உருவாக்கி வருகிறது” என குறிப்பிடப்பட்டுள்ளது.
மற்ற பொருளாதார நிலைகள்
பணவீக்கம் – குறைந்த அளவில் கட்டுப்பாட்டுக்குள் உள்ளது
வேலைவாய்ப்பு – படிப்படியாக உயர்ந்து வருகிறது
ஏற்றுமதி – மெதுவாக மேம்பட்டு வருகிறது
வங்கிக் கடன் – வர்த்தகத் துறைக்கு ஆரோக்கியமான அளவில் செல்கிறது
நகர்ப்புற நுகர்வு – அதிகரித்து, பொருளாதார தேவையை வலுப்படுத்துகிறது
இதன் மூலம், இந்திய பொருளாதாரம் உலக அரங்கில் புதிய உச்சங்களை நோக்கி பயணிக்கிறது என்பதில் சந்தேகம் இல்லை.
Read More : வருமான வரி: இதை செய்வதற்கு இன்றே கடைசி வாய்ப்பு..! தாமதித்தால் நோட்டீஸ் வரும்..!
